რამდენი მრჩეველი ჰყავს საზოგადოებრივი მაუწყებლის გენერალურ დირექტორს, ვინ არიან ისინი, რა სამუშაოს შესრულება უწევთ, ან როგორია მათი ანაზღაურება - ამ კითხვებით On.ge-მ საზოგადოებრივი მაუწყებლის საჯარო ინფორმაციის გაცემაზე პასუხისმგებელ პირს 6 თებერვალს მიმართა.

საჯარო ინფორმაციის გაცემაზე პასუხისმგებელმა პირმა, ინფორმაცია დირექტორის მრჩევლებისა და კონსულტანტების ვინაობის შესახებ არ მოგვაწოდა, რადგან მიიჩნია, რომ ამით მათ პერსონალურ მონაცემებს გასცემს და კანონს დაარღვევს. მის მიერ მოწოდებული ინფორმაციიდან კი ირკვევა, რომ მოქმედ დირექტორს, 2017 წლის 6 თებერვლის მდგომარეობით, ერთი მრჩეველი და ორი კონსულტანტი ჰყავს. მრჩეველი მიმდინარე წლის 10 იანვარს მიიღო, კონსულტანტები კი არხზე მის მისვლამდე, 2015 და 2016 წლებიდან, მუშაობენ. მათი სამუშაო აღწერილობა დამტკიცებული არ არის.

ამავე დოკუმენტის მიხედვით ირკვევა, რომ მაღლაფერიძემ ორი კონსულტანტი აიყვანა, რომლებიც მოგვიანებით, ექსპერტები გახდნენ.

განსხვავებულ ინფორმაციას აწვდის On.ge-ს არხის დირექტორი, ვასილ მაღლაფერიძე. მისი თქმით, მას სამი მრჩეველი - ია ანთაძე, ნოდარ ჭიჭინაძე და ვახტანგ სალია - ჰყავს, რომლებიც მისი მისვლის შემდეგ დაინიშნენ, საჯარო ინფორმაციაში მითითებულ ექსპერტებში კი სწორედ ისინი იგულისხმებიან.

კითხვაზე, როდესაც მუშაობა დაიწყეთ მაუწყებელში, ვინ დაგხვდათ გენერალური დირექტორის მრჩევლებად და კონსულტანტებად, მაღლაფერიძე ასე პასუხობს:

"ვერ გეტყვით, ამით არ დავინტერესებულვარ, მე თვალით არ მინახავს არავინ, თან ვადა გასდიოდათ. სანამ თანამშრომლების გაცნობა მოვასწარი. ისე გაუვიდათ ვადა, რომ ვერც მოვასწარი ნახვა და არც ვიცი სად ისხდნენ."

გიორგი ბარათაშვილის სხვადასხვა დროს სულ 6 კონსულტანტი ჰყავდა, რომელთა ანაზღაურებას 2013-2016 წლებში 258 691 ლარი იყო. მაღლაფერიძეს კი 3 მრჩეველი და კონსულტანტი ჰყავს (მათგან ორი ბარათაშვილის დანიშნულია), რომლებმაც, მაღლაფერიძის დანიშვნიდან (2017 წლის 6 იანვარი) 6 თებერვლამდე, 12 750 ლარი გამოიმუშავეს.

ფოტო: გელა ბოჩიკაშვილი/On.ge