საყვარელი ფილმი განმეორებით, ალბათ, თითქმის ყველას გვინახავს, თუმცა ჩვენი ენთუზიაზმი ფლორიდაში მცხოვრები რამირო ალანისას ნამდვილად ვერ შეედრება. რამირო ალანისმა საყვარელი ფილმი Avengers: Endgame კინოთეატრებში 191-ჯერ ნახა. ერთი და იმავე ფილმის ყველაზე მეტჯერ ნახვის გამო ალანისი გინესის მსოფლიო რეკორდების წიგნში შევიდა.

რეკორდის შესახებ ალანისმა საზოგადოებას ტვიტერზე გამოქვეყნებული ფოტოთი ამცნო, სადაც გინესის რეკორდის დამყარების დამადასტურებელი სერთიფიკატი უჭირავს.

Avengers: Endgame კინოთეატრებში 3 თვის განმავლობაში გადიოდა. რეკორდის დასამყარებლად რამირო ალანისი კინოთეატრს 94 დღის განმავლობაში, სულ მცირე, დღეში ორჯერ სტუმრობდა და 3-საათიან ფილმს უყურებდა.

ალანისმა აღნიშნა, რომ ყველაზე რთული სოციალური ცხოვრების, ოჯახთან ურთიერთობისა და სპორტული დარბაზის დათმობა აღმოჩნდა. რეკორდის დასამყარებლად, დამატებით, ფილმის ჩვენებებსა და სამუშაო საათებს შორის ბალანსის დაცვა უწევდა.

აღსანიშნავია, რომ წინა რეკორდსმენი იუთუბერი NemRaps იყო, რომელმაც ფილმს კინოთეატრში 100-ჯერ უყურა.