ქართული ოცნების წევრი, ნინო წილოსანი ამბობს, რომ არ უკვირს ფინანსთა მინისტრის პოსტიდან ვანო მაჭავარიანის გადადგომა, რადგან "ეს საკმაოდ სტრესულია". დეპუტატს არ უკვირს, რომ მაჭავარიანმა კერძო სექტორში გადასვლა გადაწყვიტა.

"მესმის ადამიანურად მისი გადაწყვეტილება, რომ აღარ ისურვა, დარჩენილიყო საჯარო და პოლიტიკურ სივრცეში, რადგან ეს საკმაოდ სტრესულია და იმ მოცემულობაში, რა მოცემულობაშიც ოპოზიციის კონკრეტული ლიდერები და კონკრეტული ჯგუფები აყენებენ ქვეყანას და თითოეულ ჩვენგანს, ნამდვილად თითოეული ჩვენგანი ძალიან დიდი სტრესის ქვეშ ვართ", — აღნიშნა წილოსანმა.

ვიცე-პრემიერი და ფინანსთა მინისტრი, ივანე მაჭავარიანი 31 მარტს თანამდებობიდან გადადგა. მისი თქმით, გადაწყვეტილება გასული წლის ბოლოს მიიღო, თუმცა რამდენიმე თვით გადადო.

რით იყო განპირობებული წასვლის სურვილი მას არ დაუკონკრეტებია, თუმცა მადლობა გადაუხადა ქართული ოცნების წევრებს და წარმატებები უსურვა პარტიას.

ფინანსთა მინისტრად ლაშა ხუციშვილი დაინიშნა, რომელიც ყოფილი მინისტრის მოადგილე იყო.