სტრატეგია აღმაშენებლის განცხადებით, მოლაპარაკების წინ ოპოზიციის მიერ გავრცელებული წერილი და განცხადებები ტაქტიკური შეცდომაა.

"სტრატეგია აღმაშენებელი ეთანხმება მოლაპარაკებაში ჩართული სხვა ოპოზიციური პარტიების მიერ გამოქვეყნებული წერილის სულისკვეთებას მაგრამ შექმნილ ვითარებაში, როცა პირადად ევროსაბჭოს პრეზიდენტის შარლ მიშელის ჩართულობით მიმდინარეობს მედიაცია და ჩართულია მედიატორი, რომელიც უახლოეს ხანში ჩამოდის ქვეყანაში, ამ მოლაპარაკების წინ მსგავსი შინაარსის წერილი და განცხადებები მიგვაჩნია ტაქტიკურ შეცდომად, რადგან ძალიან ჰგავს მოლაპარაკების წინ ერთგვარი გამყოფი ხაზების გავლებას, რაც ამცირებს მოლაპარაკების სივრცეს და შეთანხმების მიღწევის შესაძლებლობას", — წერია განცხადებაში.

რაც შეეხება სტრატეგია აღმაშენებლის ბლოკის ერთ-ერთ წევრ პარტიას, თაკო ჩარკვიანის "კანონი და სამართალი", ის ოპოზიციის განცხადებას უერთდება.

"ბლოკია. არაფერი განსაკუთრებული აქ არ ხდება, მე მომეწონა განცხადება რომ წავიკითხე, მე დიდი ხანია ადგილობრივ არჩევნებთან მიბმასთან დაკავშირებით ვერ ვიგებ რაღაცებს, ჯერ რეფორმა არ არის ჩატარებული და ამ სარეფორმო სისტემით, რა უნდა მიაბა. ჩემი პოზიცია ასეთია. გიორგი ალბათ სხვაგვარად ფიქრობს, ამაში დიდ პრობლემას ვერ ვხედავ, მე მომეწონა წერილი. რომ არ მოგატყუო, არც გვიკითხავს ერთმანეთისთვის, დამოუკიდებლად...", — განაცხადა თაკო ჩარკვიანმა On.ge-სთან საუბარში.

ოპოზიციური პარტიების ნაწილი აცხადებს, რომ დღევანდელ მთავრობასთან შეთანხმების მიღწევის შემთხვევაში ვართ არიან, შევიდნენ დღევანდელ პარლამენტში. ამის მისაღწევად კი რამდენიმე პუნქტს ასახელებენ.