ევროპარლამენტარმა ანა ფოტიგამ ევროკავშირში საქართველოს მისიის ხელმძღვანელობიდან ნატა საბანაძის გადადგომას სამწუხარო უწოდა. ტვიტერის პოსტში ევროპარლამენტარმა საბანაძის დამსახურებებზეც ისაუბრა.

"ბრიუსელში ყოფნის 8 წლის განმავლობაში ძალიან ბევრი გააკეთეთ, რომ საქართველო და ევროკავშირი ერთმანეთს დაახლოებოდა. თქვენზე უკეთ არავინ იცის, რამდენად რთული დავალება იყო, თუმცა თქვენი თავდადებითა და ენთუზიაზმით მოხდა ევროკავშირთან თავისუფალი ვაჭრობის შეთანხმების გაფორმება და ვიზალიბერალიზაცია", — წერს ფოტიგა.

ნატალია საბანაძემ ევროკავშირთან საქართველოს მისიის ხელმძღვანელისა და ბელგიასა და ლუქსემბურუგში საქართველოს ელჩის თანამდებობა 21 მარტს დატოვა. მისი თქმით, გადადგომის მიუხედავად, საქართველოს ევროპული მომავლისთვის ყოველთვის იბრძოლებს. 22 მარტს, მან ტვიტერზე იმედი გამოთქვა, რომ მმართველ პარტიასა და ოპოზიციას შორის მოლაპარაკებები გაგრძელდება და საქართველო გახანგრძლივებულ კრიზისს ვერ გაუძლებს.

გადადგომის შემდეგ Le Monde-თან ინტერვიუში, საბანაძემ აღნიშნა, რომ ყველა ჩვენი ლიდერი ამბობს, რომ ვიყოთ პროევროპელები, თუმცა თქმა საკმარისი არ არის, "საჭიროა რომ ვიყოთ".

გაიგეთ მეტი: