ნაციონალური მოძრაობის ლიდერი, სალომე სამადაშვილი ფიქრობს, რომ ევროკავშირთან საქართველოს მისიის ხელმძღვანელის, ნატალია საბანაძის თანამდებობიდან გადადგომა, ხელისუფლების მიერ საგარეო პოლიტიკური კურსის ცვლილებას უკავშირდება.

"იმ ფონზე, როდესაც ქვეყანაში უმძიმესი პოლიტიკური კრიზისია და ამ პოლიტიკური კრიზისის განმუხტვაში ევროკავშირის მცდელობას, რომ მოეძებნა გამოსავალი, ქართულმა ოცნებამ უპასუხა მტკიცე უარით, ფაქტობრივად, უარი თქვა ევროკავშირის გამოწვდილ ხელზე, ევროკავშირში ჩვენი ელჩის განცხადება, რომ ევროკავშირში ქვეყნის მომავალს ალტერნატივა არ აქვს და თანამდებობიდან გადადგომა, მე ვფიქრობ, არის პირდაპირ განაცხადი იმის შესახებ, რომ როგორც ჩანს, მას ძალიან მტკიცედ აქვს განცდა, რომ დღევანდელმა ხელისუფლებამ შეიცვალა საგარეო პოლიტიკური კურსი", — განაცხადა სალომე სამადაშვილმა მთავარი არხის ეთერში.

დღეს ცნობილი გახდა, რომ ევროკავშირთან საქართველოს მისიის ხელმძღვანელმა, ნატალია საბანაძემ თანამდებობა დატოვა. განცხადებაში, რომელიც მან საკუთარ ფეისბუქ გვერდზე გამოაქვეყნა ვკითხულობთ, რომ იგი ყოველთვის იბრძოლებს საქართველოს ევროპული მომავლისთვის.

ქართულ ოცნებასა და ოპოზიციას შორის მოლაპარაკების პროცესში აქტიურად არის ჩართული ევროკავშირი. საქართველოში ევროკავშირისა და აშშ-ს ელჩების, კარლ ჰარცელისა და კელი დეგნანის ფასილიტაციით მიმდინარე მოლაპარაკებების უშედეგოდ დასრულების შემდეგ, პროცესში ევროპული საბჭოს პრეზიდენტი, შარლ მიშელი ჩაერთო. მან მოლაპარაკებები ფალისიტაციიდან მედიაციის პროცესში გადაიყვანა და მხარეებს 6-პუნაქტიანი გეგმის ირგვლივ მსჯელობა შესთავაზა.

მიშელმა საქართველოდან გამგზავრების შემდეგ ქვეყანაში პირადი წარმომადგენელი, კრისტიან დანიელსონი გამოგზავნა. ერთკვირიანი ინტენსიური მოლაპარაკებების შემდეგ, დანიელსონი ბრიუსელში ისე დაბრუნდა, რომ ქართულ ოცნებასა და ოპოზიციას შორის შეთანხმება ვერ მოხერხდა.

კრისტიან დანიელსონის ბრიუსელში დაბრუნების შემდეგ, ევროპალამენტარმა, რაისა იუკნევიჩიანემ განაცხადა, რომ საქართველომ ევროპის გაწვდენილი ხელი არ მიიღო.

გაიგეთ მეტი: