ნაციონალური მოძრაობის წევრის, სალომე სამადაშვილის განცხადებით, თუ ყოფილი პრემიერმინისტრი, გიორგი გახარია შექმნის პოლიტიკურ პროექტს, ამით ქართული ოცნების ყოფილი თავმჯდომარე, ბიძინა ივანიშვილი ეცდება, რომ მმართველი პარტია ჩაანაცვლოს. ამის შესახებ მან TV პირველის ეთერში ისაუბრა.

"მე არ ვფიქრობ, საერთოდ არ მოვიზარებ, რომ გახარიამ შეიძლება რაიმე პოლიტიკური პროექტი შექმნას, რომელიც ოპოზიციას გაუწევს კონკურენციას. თუ ეს მართლაც ასეა და ის აპირებს, რომ პოლიტიკური პროექტი განახორციელოს, ეს იქნება პოლიტიკური პროექტი, რომლის უკანაც დგას ბიძინა ივანიშვილი და იქნება პროექტი, რომლითაც ივანიშვილი შეეცდება, ჩაანაცვლოს სრულიად გაკოტრებული პოლიტიკური პროექტი ქართული ოცნების სახით, ანუ ეს იქნება ალტერნატიული საყრდენი ბიძინა ივანიშვილისთვის ქართულ პოლიტიკაში დასარჩენად. მე დარწმუნებული ვარ, რომ არც ამ თვალსაზრისით არ იქნება ეს პროექტი წარმატებული", — თქვა სამადაშვილმა.

პრემიერმინისტრობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

18 თებერვალს, ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიას გადადგომამდე ხმები მანამდეც ვრცელდებოდა, თუმცა გადადგომამდე 6 დღით ადრე მან განაცხადა, რომ არსად მიდის და ჯერჯერობით "მოდის".