ქართული ოცნების ფრაქციის ლიდერის, მამუკა მდინარაძის განცხადებით, შეუძლებელია თვეების მანძილზე "ხელოვნური" კრიზისი მიმდინარეობდეს, ამიტომაც ახალ დღის წესრიგზე უნდა გადავიდნენ.

დღეს, 20 მარტს ქართული ოცნების ოფისში პოლიტსაბჭოსა და უმრავლესობის სხდომები გაიმართა. როგორც მამუკა მდინარაძემ ჟურნალისტებთან აღნიშნა, პარტიაში არაერთ საკითხზე იმსჯელეს, მათ შორის ვერშემდგარ შეთანხმებაზე.

მდინარაძის თქმით, ის "კომპრომისული ნაბიჯები", რომელიც გადაიდგა მათი მხრიდან, მოლაპარაკებათა მაგიდასთან დევს და ოპოზიციას გადაწყვეტილების მიღება შეუძლია.

"ჩვენ მიგვაჩნია, რომ უნდა გადავიდეთ ახალ დღის წესრიგზე, მართლაც შეუძლებელია თვეების განმავლობაში გრძელდებოდეს მოგონილი კრიზისი. მაშინ, როცა მთავარ საკითხებად აყენებენ პარლამენტში შემოსვლას, როცა აყენებ ნიკა მელიას თემას, ამ არგუმენტებით, რომელიც მათზეა დამოკიდებული აღმოიფხვრას ერთ წამში, შეუძლებელია ლაპარაკი, რომ კრიზისია ქვეყანაში", — აღნიშნავს მდინარაძე.