საფრანგეთის პრეზიდენტობის კანდიდატის, ემანუელ მაკრონის პარტიის თავმჯდომარე, რიჩარდ ფერანდი აცხადებს, რომ მედიისა და ინტერნეტის საშუალებით რუსეთი ცდილობს მაკრონის პრორუს კონკურენტებს დაეხმაროს გამარჯვებაში.

ფერანდის თქმით, მოსკოვს მოსწონს რადიკალი-მემარჯვენე ლიდერის, მარინ ლე პენისა და მემარჯვენე-ცენტრისტი კანდიდატის, ფრანსუა ფიიონის პოლიტიკური ხედვა. ფერანდმა საფრანგეთის ხელისუფლებას მოუწოდა, გადადგას ქმედითი ნაბიჯები და უზრუნველყოს არჩევნებში "უცხო ქვეყნის ჩარევის" პრევენცია.

ფერანდმა აშშ-ის საპრეზიდენტო არჩევნებზეც მიუთითა, რომელშიც სადაზვერვო სამსახურებმა კრემლის მონაწილეობა დაადასტურეს, და განაცხადა: "ამერიკელებმა დაინახეს ის, თუმცა ძალიან გვიან."

ფერადმა ტელეარხ France 2-ს უთხრა, რომ რუსული მედიასაშუალებები - Russia Today და Sputnik მაკრონზე "ყალბი ინფორმაციას" ავრცელებენ და აშშ-ის ელიტების მარიონეტად იხსენიებენ.

ემანუელ მაკრონი დამოუკიდებელი ცენტრისტი კანდიდატია, რომელიც ევროკავშირის მოწინააღმდეგე და უკრაინის მიმართ რუსეთის პოლიტიკის მხარდამჭერი პოლიტიკოსის, ლე პენის კონკურენტად მოიაზრება.