თბილისის მერის მოადგილის, ირაკლი ბენდელიანის განცხადებით, მაჭავარიანის ქუჩაზე მეწყერული პროცესი რამდენიმე დღის წინ გააქტიურდა და გზის მშენებლობასთან კავშირი არ აქვს. გარდა ამისა, პრესკონფერენციაზე მან აღნიშნა, რომ ეს კონკრეტული ერთი ფაქტის გამო არ მომხდარა.

მისი განმარტებით, მაჭავარიანის ქუჩასა და მიმდებარე ფერდებზე, ბოლო წლების განმავლობაში განხორციელებული მოქმედებების შედეგად, სტაბილიზაციაში მყოფი მეწყრული პროცესი ნაწილობრივ გააქტიურდა.

"ახლა ვართ იმ ეტაპზე, როდესაც მეწყერული პროცესის გააქტიურება სულ რამდენიმე დღეა რაც მოხდა. ჩვენ 24-საათიან რეჟიმში, ფორსმაჟორულ რეჟიმში ვმუშაობთ, რომ ეს პრობლემა, რაც შეიძლება მალე მოვხსნათ", — აღნიშნა ბენდელიანმა.

თბილისის მერის მოადგილე ამბობს, რომ ფერდობზე მეწყერული პროცესის გააქტიურებას მომდევნო კვირიდან გერმენელი ექსპერტები შეისწავლიან. ამასთან, იგი აღნიშნავს, რომ საგზაო სამუშაოებს მეწყერთან კავშირი არ აქვს.

ბენდელიანის განცხადებით, მაჭავარიანის და მარშალ გელოვანის დამაკავშირებელი ახალი გზის სამუშაოების დაწყებამდე გაკეთებული იყო დეტალური პროექტი, დაიდო გეოლოგების დასკვნები, განხორციელდა ექსპერტიზები და სწორედ ამის შემდეგ მოხდა ამ სამუშაოების დაწყება.

"მინდა მოსახლეობას ვუთხრა, რომ ეს მეწყრული პროცესები მიმდინარეობს მაჭავარიანის ქუჩის ზედა ნაწილში, ზედა ფერდობზე, ხოლო ის საგზაო სამუშაოები, რომელზეც არის საუბარი, არის მაჭავარიანის ქუჩიდან ქვედა ნაწილში", — განაცხადა ირაკლი ბენდელიანმა.

ვაშლიჯვრისა და ნუცუბიძის დამაკავშირებელ გზაზე მეწყერი ჩამოწვა. ამის ამსახველი ფოტოები 17 მარტს ფორუმზე გავრცელდა. მეწყერზე 17 მარტს ისაუბრა თბილისის მერმა, კახა კალაძემაც. მისი თქმით, აღნიშნულ ტერიტორიაზე განხორციელებული სხვადასხვა აქტივობის გამო, დროებით სტაბილიზაციაში მყოფ ძველ მეწყრულ არეალში მეორადი გენერაციის მეწყერი განვითარდა. კალაძის განცხადებით, მოქალაქეთა უსაფრთხოების მიზნით, ტრანსპორტის მოძრაობა დროებით ორმხრივად შეიზღუდა.

გაიგეთ მეტი: