პარტია გირჩი — მეტი თავისუფლების ლიდერის, ზურაბ ჯაფარიძის ინფორმაციით, მოლაპარაკებები ოპოზიციასა და მმართველ პარტიას შორის ჯერ არ დასრულებულა და დისკუსია ხვალ გაგრძელდება.

"ჯერჯერობით არაფერი დასრულებული არ არის, ხვალ გაგრძელდება ისევ დისკუსიები. დეტალებში ვერ შევალ, რაც შეიძლება გითხრათ, არის ის, რომ იყო რთული საუბარი. რაღაც საკითხებზე პოზიციები დაახლოვდა, თუმცა ჯერ საერთო შეთანხმებამდე კიდევ შორია", — განაცხადა ზურაბ ჯაფარიძემ შეხვედრის შემდეგ.

ჯაფარიძე ამბობს, რომ შეხვედრა უფრო პოზიტიურად დასრულდა, ვიდრე თავად ელოდა.

დღეს გაიმართა პირველი ერთობლივი შეხვედრა ქართულ ოცნებასა და ოპოზიციას შორის, ევროკავშირის წარმომადგენლის, კრისტიან დანიელსონის მონაწილეობით. შვედი დიპლომატი აქამდე მხოლოდ ინდივიდუალურად ხვდებოდა პარტიებს.

კრისტიან დანიელსონი, რომელიც ევროპული საბჭოს პრეზიდენტის, შარლ მიშელის პირადი წარმომადგენელია ქართულ ოცნებასა და ოპოზიციას შორის მედიაციის პროცესში, მეექვსე დღეა მართავს შეხვედრებს. გარდა პარტიების ლიდერებისა, იგი შეხვდა არასამთავრობო ორგანიზაციების წარმომადგენლებს. ასევე, რამდენჯერმე შეხვდა პრეზიდენტ სალომე ზურაბიშვილსაც.

14 მარტი იყო დანიელსონის ვიზიტის ბოლო დღე საქართველოში, თუმცა, პარტიებთან შეხვედრების შემდეგ, მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

15 მარტს დანიელსონი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.

გაიგეთ მეტი: