ბრიუსელში ვიზიტით მყოფი საქართველოს პრემიერმინისტრი, ირაკლი ღარიბაშვილი ოპოზიციას ისევ აკრიტიკებს და აცხადებს, რომ ბოლო დღეების განმავლობაში ოპონენტები დიალოგის პროცესის ხელშეშლას განსაკუთრებული დესტრუქციული მანევრით ცდილობენ.

"ოპოზიცია ბოლო დღეებში განსაკუთრებული დესტრუქციული მანევრით ცდილობს ხელი არ შეუწყოს ამ დიალოგის პროცესს. პირიქით ცდილობს გააღრმავოს ეს უფსკრული და ამის არაერთი მცდელობაც ვნახეთ ბოლო დღეების განმავლობაში, არაერთი პროვოკაცია. იმედი მაქვს, რომ ოპოზიცა გააგრძელებს კონსტრუქციულ დიალოგს და საბოლოო ჯამში მთელი ცივილიზებული ევროპის და ამ შემთხვევაში იგივე შარლ მიშელის საბოლოო სურვილი არის, რომ ჩვენ ოპოზიციასთან ერთად გავაგრძელოთ მუშაობა პარლამენტში. აი, ეს არის ჩვენი საბოლოო ამოცანა. ამას როგორ მივაღწევთ გამოჩნდება ხვალ და ზეგ, მომდევნო დღეებში", — განაცხადა ღარიბაშვილმა.

მისივე თქმით, მმართველი პარტია მოწოდებულია, რომ გამოსავალი იპოვონ, მაგრამ არცერთ შემთხვევაში ეს სახელმწიფოს ინტერესების ხარჯზე არ მოხდება.

პრემიერმინისტრი ბრიუსელში დღეს, 15 მარტს გაემგზავრა, სადაც საქართველო-ევროკავშირის ასოცირების საბჭოს მე-6 სხდომაში მიიღებს მონაწილეობას.

ვიზიტის ფარგლებში გაიმართება მაღალი დონის შეხვედრები როგორც ევროკომისიაში, ევროპულ საბჭოსა და ევროპარლამენტში, ასევე — NATO-ში.

16 მარტს, საქართველო-ევროკავშირის ასოცირების საბჭოს სხდომის შემდეგ, გაიმართება პრემიერ-მინისტრ ირაკლი ღარიბაშვილის, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის ჟოზეფ ბორელის და ევროპული სამეზობლო პოლიტიკისა და გაფართოების საკითხებში ევროკომისარ ოლივერ ვარჰეის ერთობლივი პრესკონფერენცია.

17 მარტს შეხვედრები შედგება ევროპარლამენტსა და ნატოში. საქართველოს მთავრობის მეთაურს ნატოს შტაბბინაში ალიანსის გენერალური მდივანი იენს სტოლტენბერგი უმასპინძლებს. შეხვედრის შემდეგ, ირაკლი ღარიბაშვილის და იენს სტოლტენბერგის ერთობლივი პრესკონფერენცია გაიმართება. ასევე, დაგეგმილია ნატო-საქართველოს კომისიის სხდომა.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.