კომერსანტის ინფორმაციით, თბილისში სმარტის სამი სუპერმარკეტის ნაცვლად კარფური იხსნება. გამოცემა წყაროზე დაყრდნობით წერს, რომ თბილისში - გლდანის, ვაზისუბნისა და რუსთაველის ფილიალებს კონკურენტი მაღაზია - კარფური შეცვლის.

სმარტის გლდანის ფილიალის დახურვის შესახებ კომერსანტს ინფორმაცია დაუდასტურეს ვისოლ ჯგუფში, რომელიც ამ მაღაზიათა ქსელს ფლობს.

„ჩვენ 2016 წელს მივიღეთ სტრატეგიული გადაწყვეტილება, რომ განვავითაროთ საშუალო ფორმატის მაღაზიები, დღესდღეობით სმარტის ქსელის 60 პროცენტი ისედაც ასეთი ფორმატის სუპერმარკეტები არის და მომავალში ქსელის განვითარებას ვისოლის ავტოგასამართ სადგურებზე და სხვაგანაც მხოლოდ საშუალო ფორმატში ვგეგმავთ. რაც შეეხება გლდანს, ის ჩვენს ქსელში ყველაზე დიდი სუპერმარკეტია და ვინაიდან ეს ჩვენი ნიშა არ არის, გადავწყვიტეთ, რომ ამ სავაჭრო ცენტრში, რომელიც ჩვენი ჯგუფის მფლობელობაშია, ფართი სხვა ოპერატორს მივაქირაოთ. ეს ოპერატორი კი კარფურია,"- უთხრეს კომერსანტს კომპანიაში.

On.ge რამდენიმე საათია ცდილობს კარფურისა და სმარტის წარმომადგენლებთან დაკავშირებას, თუმცა, ამ დრომდე ეს ვერ ხერხდება.