სახალხო დამცველის, ნინო ლომჯარიას განცხადებით, იმ შემთხვევაში, თუ შეთანხმება ვერ მიიღწევა, შესაძლოა, ევროკავშირთან ჩვენი ურთიერთობის პერსპექტივა გადაიხედოს. ამის შესახებ მან TV პირველის ეთერში ისაუბრა.

"ხელისუფლებას აქვს, შეიძლება, 10-ჯერ მეტი პასუხისმგებლობა, ვიდრე არახელისუფლებაში მყოფ აქტორებს. ყველაფერზე პასუხისმგებელი არის ხელისუფლება. მაგრამ დღეს გვაქვს ვითარება, რომ მხოლოდ იმის თქმა, რომ რამე არასწორად გააკეთოს ხელისუფლებამ და შემდეგ ჩვენ უბრალოდ ვთქვათ, რომ ეს თქვენი პასუხისმგებლობაა, ეს არ შველის სიტუაციას. ჩვენ ახლა ნამდვილად ვართ გზაგასაყარზე, როგორი მომავალი გვექნება, როგორი მომავალი ექნებათ ჩვენს შვილებს უახლოესი წლების და პერიოდის განმავლობაში. ხომ? ამ მოლაპარაკებებში ჩართული არის ევროკავშირი და შეიძლება საერთოდ ევროკავშირთან ურთიერთობის პერსპექტივაც გადაიხედოს იმ შემთხვევაში, თუ მათ დაინახეს, რომ ამ ხალხთან უბრალოდ ურთიერთობა და ნორმალური პოლიტიკური მოლაპარაკება შეუძლებელია", — აცხადებს ლომჯარია.

ევროპული საბჭოს პრეზიდენტი, შარლ მიშელი საქართველოში 28 მარტს ჩამოვიდა. 1-ელ მარტს, მან ოპოზიციონერ ლიდერებთან და ქვეყნის პრემიერმინისტრთან, ირაკლი ღარიბაშვილთან ერთობლივი შეხვედრა გამართა. შეხვედრაზე იმსჯელეს ქვეყანაში პოლიტიკური პროცესების გაჯანსაღების 6-პუნქტიან გეგმაზე.

ქვეყნის დატოვების შემდეგ, მიშელმა გადაწყვიტა საქართველოში პირადი წარმომადგენელი გამოეგზავნა, რომელიც მმართველ პარტიასა და ოპოზიციას შორის მედიაციის პროცესში ჩაერთვებოდა. ევროპული საბჭოს განცხადებაში ვკითხულობთ, რომ შუამავლის საქართველოში მივლინება ევროკავშირის უმაღლეს წარმომადგენელთან, ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

კრისტიან დანიელსონი საქართველოში 12 მარტს ჩამოვიდა. იგი უკვე შეხვდა პრეზიდენტს, პრემიერმინისტრს, ქართული ოცნებისა და ოპოზიციის, ასევე, არასამთავრობო ორგანიზაციების წარმომადგენლებს.

გაიგეთ მეტი: