ლელოს ლიდერის, ბადრი ჯაფარიძის თქმით, პრემიერმინისტრი ირაკლი ღარიბაშვილი ბრიუსელში სავსე ხელებით ნამდვილად წავიდა, თუმცა "პრობლემებით სავსე ხელებით". ამის შესახებ მან ფორმულას ეთერში ისაუბრა.

"დავეთანხმები ქართულ ოცნებას, სავსე ხელებით წავიდა [ბრიუსელში] ბატონი [ირაკლი ღარიბაშვილი], ოღონდ პრობლემებით სავსე ხელებით. შესაბამისად, მინდა გითხრათ, რომ ჩემი ოპტიმიზმი არ შერყეულა იმიტომ, რომ როგორც მოსალოდნელი იყო, ჩვენი ქვეყნის ერთგულმა მეგობრებმა, ევროკავშირს ვგულისხმობ და ამ შემთხვევაში შარლ მიშელს, როგორც ერთ-ერთ უმაღლესი თანამდებობის პირს ევროკავშირში და მის წარმომადგენელს, დანიელსონს, მათ თქვეს, რომ ისინი იმუშავებენ მანამ, სანამ მხარეები არ შეთანხმდებიან, რის გამოც, ჩემი ოპტიმიზმი უფრო გაიზარდა", — განაცხადა ჯაფარიძემ.

ევროპული საბჭოს პრეზიდენტი, შარლ მიშელი საქართველოში 28 მარტს ჩამოვიდა. 1-ელ მარტს, მან ოპოზიციონერ ლიდერებთან და ქვეყნის პრემიერმინისტრთან, ირაკლი ღარიბაშვილთან ერთობლივი შეხვედრა გამართა. შეხვედრაზე იმსჯელეს ქვეყანაში პოლიტიკური პროცესების გაჯანსაღების 6-პუნქტიან გეგმაზე.

ქვეყნის დატოვების შემდეგ, მიშელმა გადაწყვიტა საქართველოში პირადი წარმომადგენელი გამოეგზავნა, რომელიც მმართველ პარტიასა და ოპოზიციას შორის მედიაციის პროცესში ჩაერთვებოდა. ევროპული საბჭოს განცხადებაში ვკითხულობთ, რომ შუამავლის საქართველოში მივლინება ევროკავშირის უმაღლეს წარმომადგენელთან, ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

კრისტიან დანიელსონი საქართველოში 12 მარტს ჩამოვიდა. იგი უკვე შეხვდა პრეზიდენტ, პრემიერმინისტრ, ქართული ოცნების და ოპოზიციი, ასევე, არასამთავრობო ორგანიზაციების წარმომადგენლებს.

გაიგეთ მეტი: