თბილისის მერიასთან ტელეკომპანია რუსთავი 2-ის მხარდასაჭერია აქცია მიმდინარეობს. აქციაზე ისმის შეურაცხმყოფელი სიტყვები. თბილისის მერიის უსაფრთხოების სამსახურისა და საპატრულო პოლიციის თანამშრომლები არ უშვებენ აქციის მონაწილეებს მერიის შენობაში.

"მთელი სუსი არის აქ, ახლა მერიასთან მობილიზებული. ჩაკეტეს მერია და არ უშვებენ არავის. საჯარო სივრცეში არ უშვებენ მოქალაქეებს და მით უფრო პარლამენტისა და საკრებულოს დეპუტატებს. [დავით] ნარმანია იმალება, თუ მალე არ გამოვა, ეს ადამიანი რამდენიმე დღეში ამ შენობაში ვერ შევა," - უთხრა რუსთავი 2-ს ნაციონალური მოძრაობის წევრმა, ნიკა მელიამ.

მერიის შენობასთან აქცია რუსთავი 2-ის საქმის განმხილველი მოსამართლის, ნატა ნაზღაიძის ძმის, ზვიად ნაზღაიძისთვის, კომპენსაციის სახით, ქონების გადაცემის გამო იმართება. აქციის მონაწილეების მოთხოვნაა ნაზღაიძისთვის გადაცემული ქონება თბილისის მუნიციპალიტეტის საკუთრებაში დაბრუნდეს.