როგორც ერთგულმა მაყურებლებმა უკვე კარგად იციან, HBO თავისი საკულტო სერიალის Game of Thrones (სამეფო კარის თამაშები) პრიქველს — House of the Dragon (დრაკონების სახლი) იღებს.

7 მარტს გამოქვეყნებულ ინტერვიუში, ამ მომავალი სერიალის მსახიობმა, ოლივია ქუქმა ამ ერთ-ერთ ყველაზე მაღალი მოლოდინების მქონე შოუზე ისაუბრა და აღნიშნა, რომ მასში ქალების მიმართ ძალადობის ისეთი სცენები აღარ იქნება წარმოდგენილი, როგორც ეს სამეფო კარის თამაშებიდან გვახსოვს.

"თავს კომფორტულად ვერ ვიგრძნობდი ნებისმიერ პროექტში მონაწილეობისას, რომელიც სრულიად უმიზეზოდ ქალებზე ძალადობის შემზარავ ვიზუალიზაციას შეიცავს. თანაც მხოლოდ იმიტომ, რომ ამით მაყურებლის ემოციებზე იმოქმედონ. სანამ როლზე დავთანხმდებოდი, მანამდე სცენარის წაკითხვის შესაძლებლობა მქონდა და ის [სამეფო კარის თამაშების] პირველი სეზონებისგან ბევრად განსხვავდება. არ მგონია, რომ შოუს შემოქმედები მსგავსი რაღაცების განმეორებას ფიქრობდნენ", — განაცხადა მან.

სამეფო კარის თამაშების შემქმნელებს პირველ სეზონებში ქალ პერსონაჟებზე ძალადობის სცენების ხშირი ჩვენების გამო აკრიტიკებდნენ. მაგალითად, ყველაზე ურთიერთსაწინააღმდეგო შეფასებები სანსა სტარკის გაუპატიურების ეპიზოდმა დაიმსახურა.

ფოტო: HBO

ფილმების Sound of Metal და Ready Player One ვარსკვლავი ოლივია ქუქი ერთ-ერთია იმ მსახიობებს შორის, რომელთაც დრაკონების სახლში ვიხილავთ: მასთან ერთად სამსახიობო გუნდის წევრები არიან ემა დარსი, მეთ სმიტი და პედი კონსიდაინი.

როგორც უკვე ცნობილია, მომავალი სერიალი ტარგარიენების სამოქალაქო ომის, იგივე "დრაკონების ცეკვის" შესახებ იქნება, რომელიც სამეფო კარის თამაშებში ასახულ ისტორიამდე 200 წლით ადრე მოხდა.

სერიალს კვლავ ჯორჯ მარტინის წიგნების კიდევ ერთი ცნობილი სერიის Fire and Blood-ის მიხედვით იღებენ, რომელიც ტარგარიენების საგვარეულოს წარმომადგენლების ცხოვრების შესახებ მოგვითხრობს.

სერიალის პრემიერა 2021-ის ბოლოს ან 2022 წელს შედგება.