"მე როდესაც ეს გადაწყვეტილება მივიღე და შევუერთდი ქართულ ოცნებას, არნახული ბულინგი წავიდა ჩემზე და ჩემს ოჯახზე. ამდენი ღვარძლი, ამდენი ლანძღვა-გინება", — აცხადებს ქართული ოცნების დეპუტატი და ყოფილი კალათბურთელი ვიქტორ სანიკიძე. ამის შესახებ მან იმედის ეთერში ისაუბრა, როცა ბერა ივანიშვილის ფარულ ჩანაწერებზე გამოხმაურებას განიხილავდა.

ჟურნალისტმა მას ჰკითხა, რატომ ჩათვალა საჭიროდ, ინსტაგრამზე ბერასთან ერთად გადაღებული ფოტოს გამოქვეყნება, რაზეც სანიკიძემ უპასუხა, რომ მისთვის მიუღებელი იყო პროტესტის ის ფორმა და ბულინგი, რაც ჩანაწერების გავრცელებას მოყვა.

"ცოტა გვერდზე რომ გადავდოთ შინაარსი ამ ჩანაწერისა, ავთენტურია თუ არაა ავთენტური, დამონტაჟებულია თუ როგორ არის. რაც მე შემდეგ დღეს ვიხილე პროტესტის სახით, პერფორმანსი, თუ რაც დავარქვათ, რაც ხდებოდა მეორე დღეს ამ ოჯახის სახლთან, ეს არის იმდენად მიუღებელი და ისეთი ლუსტრაცია იმ მხარის, რომელზედაც ჩვენ ვსაუბრობთ, რომ არამგონია, რომ ნებისმიერ საღადმოაზროვნე ჩვენი ქვეყნის მოქალაქეს, როდესაც ამ ფორმის პროტესტს შეხედავს, იმისთვის ძალიან ნათელია, ხომ რასთან გვქვს საქმე.

აქედან გამომდინარე, ძალიან მარტივია ჩემთვის, პასუხის გაცემა იმ კითხვაზე, რაც დამისვით, ამ მაგალითს რომ ავიღებთ რა ფორმითაც აპროტესტებენ ამა თუ იმ ჩანაწერს. [...] აქ ისეთი საზოგადოებაა, ჩემზე ბევრად გამოცდილი პოლიტიკურ სივრცეში, მე არ მახსენდება, ჩემთვის არის ძალიან შემაძრწუნებელი ის პროტესტის ფორმა, რაც იყო", — თქვა მან.

გარდა ამისა, მანვე განაცხადა, რომ პოლიტიკაში მოსვლამდე ჰქონდა სურვილი, რომ არასდროს მოსწეოდა საუბარი ყოფილ ხელისუფლებაზე, რადგან ეს დისკომფორტს უქმნიდა. მისი აზრით, ეს ქვეყანას უკან ხევს.

"მქონდა სურვილი იმისი, რომ არასდროს მქონოდა იმასთან შეხება, რომ მესაუბრა ისევ იმ წინა მმართველობის ბინძურ რაღაცა მეთოდებით... სრულიად გულწრფელად. მანამდე სანამ ამ პოლიტიკურ ასპარეზში ჩავერთვებოდი, ძალიან დიდ დისკომფროტს მიქმნიდა მეც, როგორც ამ ქვეყნის მოქალაქეს, რომ ვსაუბრობდით ამ წარსულზე. გულწრფელად მგონია, რომ ეს ჩვენი ქვეყნის გავითარებას უკან ხევს", — განაცხადა მან და აღნიშნა, რომ სამწუხაროა, რომ 2021 წელს ისევ 2010 წლის ჩანაწერებს განიხილავენ.