როგორც წესი, გარეულ ცხოველებს დაუნდობლებად და მხეცებად ახასიათებენ, თუმცა ეს ამბავი დაგარწმუნებთ, რომ ყოველთვის ასე ნამდვილად არ არის.

ორ მარტს ზოოლოგიურ ცენტრს რაჭიდან ჩამოყვანილი ორი დაობლებული ბელი მიაბარეს: როგორც დათვების თავშესაფარში ვარაუდობენ, ბელების დედა ბრაკონიერებმა მოკლეს, თორემ ისე მათ ბუნაგისგან შორს, მარტოებს ვერ იპოვიდნენ.

გარეული ცხოველის თავისი ბუნებრივი საცხოვრებელი გარემოდან მოშორება დიდი შეცდომა და მათთვის აუნაზღაურებელი ზიანის მომტანია. თუმცა თავშესაფარში უკვე ვერაფერს გააწყობდნენ, ისღა დარჩენოდათ, სულ მცირე ასაკის ბელების გადარჩენა ეცადათ. ამიტომაც ისინი თავიდან ხელოვნურ კვებაზე ჰყავდათ.

უდედოდ დარჩენილ ბელებს ჯერ თვალებიც კი არ ჰქონდათ ახელილი.

ფოტო: ზოოლოგიური ცენტრი

პირველადი მზრუნველობის შემდეგ, თავშესაფრის მესვეურებმა უფრო რთული მისია დაისახეს: თავშესაფარში მანამდე მყოფი მეძუძური დედა დათვისთვის, რომელიც გასულ წელს მოიყვანეს ზოოლოგიურ ცენტრში მძიმედ დაშავებული, ობოლი ბელები მიეშვილებინათ, რათა მათ გამოკვებაზე აქტიურად ეზრუნა.

ეს პროცესი განსაკუთრებულ სიფრთხილეს და მრავალი წესის დაცვას მოითხოვს, რადგან დიდია შანსი, რომ მცდელობა წარუმატებელი აღმოჩნდეს და დედა დათვმა სხვა ბელები არ მიიღოს.

თუმცა მათ მაინც უნდა ეცადათ და შედეგს გაფაციცებული ელოდნენ.

ფოტო: ზოოლოგიური ცენტრი

სულ რამდენიმე საათის წინ კი თავშესაფრის ფეისბუქგვერდზე გავრცელდა ინფორმაცია, რომ ყველაფერმა წარმატებით ჩაიარა და დედა დათვმა ბელები მიიღო!

მიუხედავად იმისა, რომ ეს საკმაოდ იშვიათი შემთხვევაა მტაცებელ ცხოველებში, როგორც ჩანს, სასწაული მაინც მოხდა.

ფოტო: ზოოლოგიური ცენტრი

როგორც გვპირდებიან, ბელების გაზრდის და თავშესაფარში ცხოვრების შესახებ ინფორმაციას აწი უფრო აქტიურად გაგვიზიარებენ.

ზოოლოგიური ცენტრის ზოგადი მისიის აღწერაში ვკითხულობთ, რომ გადაშენების პირას მყოფი მურა დათვების თავშესაფარი 2010 წელს საქართველოს გარემოსა და ბუნებრივი რესურსების დაცვის სამინისტროს თანხმობით შეიქმნა ქვეყანის მასშტაბით უკანონო ტყვეობაში მყოფი წითელი ნუსხით დაცული, გადაშენების პირას მყოფი მურა დათვების პრობლემის მოსაგვარებლად.

დაწვრილებით ინფორმაციისთვის შეგიძლიათ ეწვიოთ ვებგვერდს: Bears-shelter.com

დათვების რეაბილიტაციისთვის ფინანსური დახმარება ნებისმიერ მსურველს შეუძლია:

საქართველოს ბანკი:
GE05BG0000000037320500