ეკონომიკის მინისტრის, ნათია თურნავას განცხადებით, Wizz Air მარტის ბოლოდან ქუთაისის საერთაშორისო აეროპორტში ფრენებს აახლებს და ამ მომენტისათვის არსებული ინფორმაციით, ფრენებს 20 მიმართულებით, კვირაში 45 რეისს შეასრულებს.

"მარტის ბოლოდან საქართველოს ავიაბაზარზე ოპერირებას დაიწყებს ახალი ავიაკომპანია Wizz Air Abu Dhabi და ფრენებს შეასრულებს აბუდაბი-ქუთაისი-აბუდაბის მიმართულებით, კვირაში 2 სიხშირით", — განაცხადა თურნავამ.

თუმცა, 19 თებერვალს Wizz Air-ის კომუნიკაციების ხელმძღვანელმა, ანდრაშ რადომ განაცხადა, რომ საქართველოდან ფრენების მარტში დაწყება ძალიან ადრეა. როგორც რადომ აღნიშნავ, მათ ფრენების დაწყება მეტწილად ევროპულ ქვეყნებზეა დამოკიდებულია და იმაზე, როდის მისცემენ მესამე ქვეყნებს ევროკავშირში შესვლის უფლებას.

ბრიფინგზე ეკონომიკის მინისტრმა ასევე აღნიშნა, რომ ფრენებზე შეზღუდვების მოხსნის შედეგად ზოგიერთმა ავიაკომპანიამ ფრენის სიხშირე გაზრადა. მაგალითად, თურქეთის ავიახაზებმა, რომელიც რეისს კვირაში სამი სიხშირით ახორციელებდა, ამ მომენტისათვის დღეში ორ რეისს ასრულებს.

"პეგასუსი კვირაში ფრენებს ასრულებდა მხოლოდ ორი სიხშირით, ამ მომენტისათვის ყოველდღიურად დაფრინავს. კატარის ავიახაზებიც ყოველდღიურ რეისებზე გადავიდა კვირაში 4 სიხშირით. დღევანდელი მდგომარეობით, რეგულარული სამგზავრო ფრენები მარტის განმავლობაში კვირაში განხორციელდება, დაახლოებით, 70-მდე ფრენა, ხოლო დღეს მიღებული განაცხადებით, ზაფხულში ეს იქნება 200 ფრენა. გასული წლის აგვისტოში 10-12 ფრენა იყო კვირაში, რაც იმას ნიშნავს, რომ შვიდჯერ იზრდება", — ამბობს თურნავა.

მინისტრის თქმით, საქართველოში პირველი ვაქცინირებული ტურისტების ნაკადებიც გამოჩნდა. თურნავას განცხადებით, მარტის ბოლოს ისრაელის ავიაკომპანია სამ ტურისტულ ჩარტერულ რეისს 19-22 და 26 მარტს თელავივი-ბათუმი-თელავივის მიმართულებით შეასრულებს.

თებერვლიდან საქართველოს მიმართულებით ფრენები უკრაინის საერთაშორისო ავიახაზებმა, კვირაში 2 სიხშირით განაახლა, flydubai-მ კვირაში 4 სიხშირით, Air Arabia-მ კვირაში 2 სიხშირით.