ლიეტუვის პარლამენტის საგარეო საქმეთა კომიტეტის თავმჯდომარის, ჟიგიმანტას პავილიონისის განცხადებით, მან ციხიდან ნაციონალური მოძრაობის თავმჯდომარის, ნიკა მელიას წერილი მიიღო. პავილიონისიმ მელიას "ივანიშვილის მმართველობის პატიმარი უწოდა" და საკუთარ ფეისბუქზე გაასაჯაროვა წერილი, სადაც ენმ-ს თავმჯდომარე მხარდაჭერისთვის მადლობას უხდის.

"დღეს ციხიდან ყველაზე მნიშვნელოვანი სიტყვები მივიღე. ივანიშვილის მმართველობის პატიმრის, ნიკა მელიას სიტყვები, რომელიც მისმა წარმომადგენელმა გადმომცა.

ნიკამ მომცა საშუალება გავასაჯაროვო ეს სიტყვები, გავუზიარო ლიეტუვაში საქართველოს ყველა მეგობარს. ის გულწრფელად გიხდით მადლობას დღეს. მადლობა პირადად ჩემგან ყველას, ვინც მხარს უჭერს თავისუფლებასა და დემოკრატიას, ასევე სეიმების თავმჯდომარეს, ყველა ჩემს სხვა ასოციაციას, ვინც არ უღალატა თავისუფლებას. ჩვენ აუცილებლად მოვიგებთ. იმედია, პრეზიდენტი წაიკითხავს ამ სიტყვებს და დაფიქრდება მაინც.

წერილში ვკითხულობთ — ძვირფასო ჟიგის, ნიკამ დამირეკა ციხიდან. მან მთხოვა, თქვენთვის გადმომეცა მისი მადლიერება იმისთვის, რაც გააკეთეთ და რასაც აკეთებთ, რომ ეს საქმე საერთაშორისო მეგობრებთან წამოწიოთ. თქვენ რომ არა, ეს საკითხი ჩვენი საერთაშორისო მეგობრების დღის წესრიგში ასე მაღლა არ იქნებოდა, ამიტომ პირადად თქვენ კიდევ ერთხელ გადაგიხადათ ძალიან ბევრი მადლობა" — წერს იგი.

ჟიგიმანტას პავილიონისი ნაციონალური მოძრაობის თავმჯდომარის, ნიკა მელიას დაპატიმრებამდე საქართველოში იყო ჩამოსული და სიტუაციის განმუხტვის მიზნით ოპოზიციისა და მთავრობის წარმომადგენლებს შეხვდა. მან მმართველი გუნდის მიმართ კრიტიკა მას შემდეგ გაააქტიურა, რაც მისი განცხადებების გამო ქართული ოცნება მას აკრიტიკებდა. მათ შორის, პრემიერმინისტრმა, ირაკლი ღარიბაშვილმა მას "ნაცმოძრაობასთან პირდაპირ დაკავშირებული" უწოდა. პავილიონისი ამბობდა, რომ ქართველების ერთმანეთთან დაპირისპირება "პუტინისთვის საუკეთესო საჩუქარია". იგი მოუწოდებდა მხარეებს, რომ არ გაჰყოლოდნენ ბელარუსის გზას.

ნიკა მელიას დაკავებას საქართველოს მეგობარ ქვეყნებსა თუ პარტნორ ორგანიზაციებში კრიტიკული შეფასებები მოჰყვა. აშშ-ის პოზიცია საქართველოში ქვეყნის საელჩომ გამოხატა და თქვა, რომ ევროატლანტიკურ სახელმწიფოთა ოჯახში უფრო ძლიერი დემოკრატიისკენ მიმავალ გზაზე უკან დაიხია. შეშფოთება გამოთქვა ამერიკელმა კონგრესმენმა, საქართველოს მეგობართა ჯგუფის თანათავმჯდომარე ადამ კინზინგერმაც და მომხდარს დარბევა უწოდა. ევროკავშირის ელჩის, კარლ ჰარცელის განცხადებით კი, ქვეყანაში არსებულ ვითარებაზე პასუხისმგებლობა ყველა მხარემ უნდა აიღოს. მისი თქმით, საქართველოში პოლიტიკური კრიზისი ღრმავდება. ევროპარლამენტარ მარკეტა გრეგოროვას განცხადებით კი, ნაციონალური მოძრაობის თავმჯდომარე, ნიკა მელიას დაპატიმრება დემოკრატიის უკუსვლის აისბერგის მხოლოდ წვერია.

23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, დღეს 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.