ევროპული საბჭოს პრეზიდენტმა, შარლ მიშელმა განაცხადა, რომ ევროკავშირი მზადაა საქართველოს დასახმარებლად COVID-19-თან ბრძოლაში.

"თქვენს გვერდით ვართ COVID-19-თან ბრძოლაში. თქვენ რთულ სიტუაციაში ხართ, ამ კომპლექსურ და რთულ რეგიონში", — განაცხადა მიშელმა.

მისი თქმით, ევროკავშირის დახმარება, პირველ რიგში გამოიხატება ვაქცინაციის პროცესში. შარლ მიშელმა განაცხადა, რომ საქართველო უახლოეს პერიოდში მიიღებს კორონავირუსის ვაქცინას.

"ევროკავშირი საქართველოს გვერდით დგას პანდემიის პერიოდში. ევროკავშირი და ჩვენი გუნდი მხარს უჭერს საქართველოს 1,5 მილიარდი ევროს ოდენობის პაკეტში, იმისათვის, რომ მოხდეს სოციალურ-ეკონომიკური საკითხების დაძლევა და ჩვენ ვართ ყველაზე დიდი მონაწილე ამ პროცესში, იმისათვის რომ თქვენ გქონდეთ წვდომა ვაქცინებზე და მე პირადად გარწმუნებთ, რომ საქართველოს უახლოეს პერიოდში ექნება ვაქცინებზე წვდომა", — განაცხადა შარლ მიშელმა.

ევროპული საბჭოს პრეზიდენტი, შარლ მიშელი საქართველოში გუშინ ჩამოვიდა და დღეს, დილიდან ოფიციალურ შეხვედრებს მართავს. იგი უკვე შეხვდა საქართველოს პრეზიდენტს, სალომე ზურაბიშვილს და იმყოფებოდა საოკუპაციო ხაზთან.

ხელისუფლებისა და ოპოზიციის წარმომადგენლებთან ცალ-ცალკე გამართული შეხვედრების შემდეგ, შარლ მიშელმა ისინი ერთობლივ შეხვედრაზე მიიწვია და განაცხადა, რომ დროა "ფასილიტაციიდან გადავიდეთ მედიაციაზე".

გაიგეთ მეტი: