რაგბის კავშირის პრეზიდენტის არჩევნები ისევ ჩაიშალა. მიზეზი ახლაც იგივეა რაც ზუსტად ერთი წლის წინ, 2020 წლს 24 თებერვალს იყო — კვორუმის არარსებობა. კავშირის გამგეობის თავმჯდომარის, გიორგი მაჭავარიანის ინფორმაციით, კენჭისყრაზე 42 ხმა დაფიქსირდა, რაც არ არის საკმარისი ახალი პრეზიდენტის ასარჩევად.

არჩევნებში ერთი კანდიდატი, სოსო ტყემალაძე იღებდა მონაწილეობას. მან თქვა, რომ ჰქონდა კენჭისყრის ასე დასრულების მოლოდინი, ამიტომ, სარაგბო კლუბებს წინასწარ სთხოვა მისთვის მხარი დაეჭირათ.

"წინასწარ ვთქვი, ჩემი თხოვნაც გავუგზავნე კლუბებს, რომ არ დავკარგოთ ის ორი კვირა იმისთვის, რომ განმეორებითი [არჩევნები] ჩატარდეს. ხმათა უმრავლესობა მაქვს. ავუხსენი, რატომ იყო მნიშვნელოვანი, რომ ამ დროის განმავლობაში კლუბებში პრობლემებია, ნაკრებს თამაშები აქვს და ნუღარ დავკარგავდით დროს. მათ მიიღეს ის გადაწყვეტილება, რაც მიიღეს", — განაცხადა სოსო ტყემალაძემ.

დღეს, რაგბის კავშირში იმყოფებოდა ირაკლი აბუსერიძე, რომელიც გასული წლის 30 დეკემბერს გამართულ არჩევნებში აირჩიეს კავშირის პრეზიდენტად, თუმცა საჯარო რეესტრმა იგი არ დაარეგისტრირა.

"მოვიგეთ, გავიმარჯვეთ სრულიად ლეგიტიმურად. დღეს ის ხალხი არიან, რომლებმაც 30 დეკემბერს თავისი ხელით, თავისი გადაწყვეტილებით ჩანიშნეს არჩევნები. როცა აგებდნენ, მაგის მერე დაიწყეს უკვე საუბარი არალეგიტიმურობაზე", — განაცხადა აბუსერიძემ.

შეგახსენებთ, რომ 2020 წლის 30 დეკემბერს ჩატარებულ არჩევნებში არჩეულ კანდიდატს, ირაკლი აბუსერიძეს საჯარო რეესტრმა უარი კავშირის წესდების საფუძველზე უთხრა. რეესტრის განმარტებით, არჩევნები კავშირის ბოლო კრებიდან, გასული წლის 24 თებერვლიდან, 30 დღეში უნდა ჩატარებულიყო. რეალურად კი იგი 10 თვის შემდეგ, 30 დეკემბერს გაიმართა. გარდა ამისა, მათ ირაკლი აბუსერიძეს დამატებითი დოკუმენტების წარდგენა მოსთხოვეს.

მიმდინარე წლის 22 იანვარს ირაკლი აბუსერიძემ საჯარო რეესტრში ადმინისტრაციული საჩივარი შეიტანა, სადაც ის არ დაეთანხმა მისთვის დამატებითი დოკუმენტების მოთხოვნას. საჯარო რეესტრმა საბოლოო გადაწყვეტილება აბუსერიძისთვის რეგისტრაციაზე უარის თქმის შესახებ 8 თებერვალს მიიღო. სწორედ ამის შემდეგ ჩაინიშნა ახალი არჩევნები, რომელიც, როგორც უკვე აღვნიშნეთ ერთადერთი კანდიდატი, სოსო ტყემალაძე იღებდა მონაწილეობას.

რაგბის კავშირის გამგეობის თავმჯდომარის, გიორგი მაჭავარიანის ინფორმაციით, მომდევნო ყრილობა 10-დან 30 დღის შუალედში უნდა ჩატარდეს. ზუსტად როდის გაიმართება კავშირის პრეზიდენტის ახალი არჩევნები ჯერჯერობით უცნობია.

გაიგეთ მეტი: