ჯანდაცვის სამინისტროში თარიღს, როდის შემოვა კორონავირუსის პირველი ვაქცინა საქართველოში, ვერ აკონკრეტებენ. ჯანდაცვის მინისტრის მოადგილის, თამარ გაბუნიას იმედი აქვს, რომ Pfizer-ის პირველ დოზას ქვეყანა მარტის პირველ კვირაში მიიღებს. ის Covid-19-ის ვაქცინის შემოტანის დაგვიანებას Pfizer-ის მხრიდან დამატებითო მოთხოვნების დაწესებას უკავშირებს.

"ამ კვირაში მივიღეთ დამატებითი პირობები Pfizer-ის ვაქცინის მიღებასთან დაკავშირებით, კვირის ბოლომდე კიდევ ერთი კონსულტაცია შედგება კოვაქსის, Pfizer-სა და საქართველოს მხარის მონაწილეობით, სადაც ყველა დეტალი დაზუსტდება და გვეცოდინება ზუსტად, როდის მივიღებთ შეპირებულ 29 250 დოზას.

ამ დოზებს ველოდებით თებერვლის ბოლომდე, თუმცა Pfizer-ს მიერ დაყენებული მოთხოვნების ყველა იმ ქვეყანაში, რომელთაც ეს დოზები უნდა მიეღო, გარკვეული გადავადება მოხდა. მიმდინარე კვირაში ჩვენ დავასრულებთ მოლაპარაკებას და იმედი გვაქვს, რომ მარტის პირველ კვირაში რეალურად მივიღებთ იმ დოზებს, რასაც ველოდებით Pfizer-სგან", — განაცხადა გაბუნიამ საკოორდინაციო საბჭოს სხდომის შემდეგ გამართულ ბრიფინგზე.

მისივე თქმით, აქტიური კომუნიკაცია მიმდინარეობს AstraZeneca-სთანაც.

საქართველოში Covid-19-ზე ვაქცინა, ჯერჯერობით, არ შემოსულა. პირველი ვაქცინა, რომელიც საქართველოში უნდა შემოვიდეს Pfizer-ია. ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი.

ჯანდაცვის მინისტრის მოადგილე, თამარ გაბუნია ამბობდა, რომ COVAX პლატფორმის ფარგლებში, დაახლოებით, მარტის დასაწყისში AstraZeneca-ს 315 000 დოზა შემოვიდოდა. ხოლო AstraZeneca-სთან პირდაპირი მოლაპარაკებების საფუძველზე, გაბუნიას თქმით, საქართველო 150 ათას დოზა ვაქცინას მიიღებს.

გაიგეთ მეტი: