ნაციონალური მოძრაობის ოფისში პოლიცია არ შეუშვეს. კარებთან მათ აქტივისტები გადაუდგნენ. სამართალდამცავები იქ დაახლოებით 09:00 საათისთვის გამოჩნდნენ და განაცხადეს, რომ მელიასთან საუბარი სურთ. მათი განმარტებით, სურთ განჩინების აღსრულება.

"როგორც მოგეხსენებათ, სასამართლოს მიერ გაცემულია შესაბამისი გადაწყვეტილება, რომლის შესრულებაც დაევალა შინაგან საქმეთა სამინისტროს. შესაბამისად, გამომძიებლები, ხედავთ რა რაოდენობაც თანამშრომლების, მოვედით ოფისში, ვინაიდან ცნობილია ჩვენთვის, რომ პატივცემული ნიკანორ მელია იმყოფება აღნიშნულ ოფისში, განჩინების აღსრულების მიზნით. თუმცა თქვენ ისიც დაინახეთ, რომ კარები ჩაგვიკეტეს და არ შეგვიშვეს. აღსრულების პროცესში გათვალისწინებული და გამოყენებული იქნება კანონით გათვალისწინებული ყველა საშუალება, დამატებით განცხადებას გავაკეთებთ და მოგახსენებთ შემდეგ", — განაცხადა ადგილზე მისულმა სამართალდამცავმა.

პოლიციის წარმომდგენლებმა ენმ-ის ოფისის შესასვლელი უკვე დატოვეს. ჯერჯერობით უცნობია, რა იქნება შემდეგი ნაბიჯი, თუმცა მიმდებარედ არსებულ ბაზაზე სამართალდამცავების გადაადგილება შეინიშნება.

ნიკა მელია ამჟამად ნაციონალური მოძრაობის ცენტრალურ ოფისში იმყოფება. იქ არიან სხვა ოპოზიციური პარტიების ლიდერებიც, რომლებც აცხადებენ, რომ ხელისუფლებას მელიას დაკავების საშუალებას არ მისცემენ, რადგან უკანონო გადაწყვეტილებას არ ემორჩილებიან.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.