დღეს, 7 თებერვალს, იურიდიულ საკითხთა კომიტეტზე სასამართლო რეფორმების საკანონმდებლო პაკეტის შესახებ პრეზიდენტის შენიშვნებზე იმსჯელეს და მხარი არ დაუჭირეს. კენჭისყრისას საკითხს მხოლოდ ორი მომხრე ჰყავდა, მათ შორის პარტია ევროპული საქართველოს წევრი ირაკლი აბესაძე და პატრიოტთა ალიანსის წევრი ნატო ჩხეიძე.

სხდომაზე მომხსენებელი იყო პრეზიდენტის საპარლამენტო მდივანი ანა დოლიძე, რომელმაც მართლმსაჯულების რეფორმაზე პრეზიდენტის ვეტოს მიზეზებზე და შინაარსზე იმსჯელა.

საქართველოს პრეზიდენტს, გიორგი მარგველაშვილს მიაჩნია, რომ სასამართლო რეფორმის პაკეტი ეწინააღმდეგება ინდივიდუალური მოსამართლის დამოუკიდებლობის უზრუნველყოფის პროცესებს.

პარლამენტის რეგლამენტის მიხედვით, საქართველოს პრეზიდენტი უფლებამოსილია დადგენილ ვადაში ხელი არ მოაწეროს კანონპროექტს და მოტივირებული შენიშვნებით დაუბრუნოს იგი პარლამენტს. თუ პარლამენტი არ მიიღებს პრეზიდენტის შენიშვნებს, კენჭი ეყრება კანონპროექტის პირვანდელ რედაქციას. ამ შემთხვევაში, კანონის პროექტი მიღებულად ჩაითვლება, თუ მას მხარს დაუჭერს პარლამენტის სიითი შემადგენლობის ნახევარზე მეტი.