აშშ-ს ყოფილი პრეზიდენტი, დონალდ ტრამპი სენატში რესპუბლიკელთა ფრაქციის ლიდერს, მიტჩ მაკკონელს აკრიტიკებს. პოსტის დატოვების შემდეგ დონალდ ტრამპმა პირველი ვრცელი განცხადება გაავრცელა, სადაც მაღალი რანგის რესპუბლიკელს "პირქუში" უწოდა.

მიტჩ მაკკონელი წლების განმავლობაში სენატში რესპუბლიკური პარტიის ლიდერია. სენატორმა ყოფილი პრეზიდენტის იმპიჩმენტს მხარი არ დაუჭირა, თუმცა მოგვიანებით განაცხადა, რომ კაპიტოლიუმზე თავდასხმის გამო, დონალდ ტრამპი მორალურ პასუხისმგებლობას ატარებს.

სენატორის საპასუხოდ დონალდ ტრამპმა ვრცელი წერილი გაავრცელა. ტრამპის თქმითვე, იმის გამო, რომ მაკ-კინლეის პოლიტიკური შორსმჭვრეტელობა და სიბრძნე აკლდა, რესპუბლიკურმა პარტიამ სენატში უმრავლესობა დაკარგა. როგორც ყოფილი პრეზიდენტი აცხადებს, სენატორი "ემუდარებოდა", რომ არჩევნებზე მისი კამპანიისთვის მხარი დაეჭირა.

"მიტჩი არის პირქუში პოლიტიკანი. თუ რესპუბლიკელი სენატორები მისი ერთგულნი დარჩებიან, გამარჯვებას ვერასდროს იხილავენ. ასეთი პოლიტიკური "ლიდერებით", როგორიცაა მიტჩ მაკკონელი, რესპუბლიკური პარტია ვეღარასდროს მოიპოვებს პატივისცემასა და ძლიერ პოზიციებს", — აღნიშნულია ტრამპის წერილში.

დონალდ ტრამპს პრეზიდენტობის განმავლობაში მიტჩ მაკკონელთან კარგი ურთიერტობა ჰქონდა. თუმცა როგორც BBC წერს, ვითარება მას შემდეგ შეიცვალა, რაც ტრამპმა საპრეზიდენტო არჩევნები წააგო.

მაკკონელი აცხადებდა, რომ დეკემბრის შუა რიცხვების შემდეგ პრეზიდენტთან აღარ ულაპარაკია, ხოლო კაპიტოლიუმზე თავდასხმის შემდეგ დაძაბულობა კიდევ უფრო გამწვავდა.

13 თებერვალს სენატმა დონალდ ტრამპი მისთვის წარდგენილ ბრალდებაში გაამართლა და იმპიჩმენტის პროცედურა დაასრულა. ყოფილი პრეზიდენტის წინააღმდეგ ხმა 57-მა სენატორმა მისცა, მათ შორის ექვსი რესპუბლიკელი იყო. თუმცა საბოლოო იმპიჩმენტისთვის ეს არ იყო საკმარისი, რადგან ტრამპი 100-დან სულ მცირე 67 სენატორს უნდა გაემტყუნებინა.