სლოვაკეთის საგარეო საქმეთა სამინისტრო ოკუპირებული ცხინვალის იზოლატორში უკანონო პატიმრობაში მყოფ ზაზა გახელაძის დაუყოვნებლივ განთავისუფლებას მოითხოვს. სახელმწიფო მდივანი, მარტინ კლუზი, ტვიტერში, ასევე, ზაზა გახელაძის უკანონო დაკავების ფაქტსაც გმობს.

"სლოვაკეთის საგარეო საქმეთა სამინისტროს პოზიცია საქართველოს ტერიტორიულ მთლიანობაზე, მის დამოუკიდებლობასა და სუვერენიტეტზე უცვლელი რჩება! ამ კონტექსტში ვგმობ საქართველოს მოქალაქე ზაზა გახელაძის დაკავებას თვითგამოცხადებული სამხრეთ ოსეთის რეგიონში მის დაუყოვნებლივ გათავისუფლებას ვითხოვთ", — წერს მარტინ კლუზი.

ოკუპირებული ცხინვალის ე.წ. სასამართლომ, ზაზა გახელაძეს 12 წლითა და 6 თვით უკანონო პატიმრობა 5 თებერვალს მიუსაჯა.

საოკუპაციო ძალების მიერ გასული წლის ზაფხულში დაკავებულ ზაზა გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. რუსული მხარის მტკიცებით, ზაზა გახელაძემ ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გაიგეთ მეტი: