ნაციონალური მოძრაობის თავმჯდომარის, ნიკა მელიას განცხადებით გავრილოვის საქმეზე მონების გასასამართლებელი ადამიანი საქართველოში არ ცხოვრობს.

"მონები ვერ ასამართლებენ ვერასდროს პატრიოტ ხალხს, მორჩა, გათავდა. ამაზე მეორედ კითხვა არ დამისვათ, მონების გასასამართლებელი ადამიანი გავრილოვის საქმეზე ამ ქვეყანაში არ ცხოვრობს, მორჩა და გათავდა", — განაცხადა მელიამ.

რაც შეეხება გირაოს თანხას, მან განაცხადა, რომ თუ ვინმე ამ თანხას შეიტანს, ის სუს-ის ნება-სურვილის შემსრულებელი იქნება.

"დაიკარგება ეს ადამიანი? შეატანინებენ და 40 000 ლარი 40 ლარი ხომ არ არის? რამდენს იცნობთ, რომ 40 000 ლარი აქვს? ის იქნება ჩვეულებრივი სახელმწიფო უსაფრთხოების სამსახურის არა, ბიძინა ივანიშვილის სპეცსამსახურის, სუს-ის შემსრულებელი ნება-სურვილის. ნებისმიერი ადამიანი, ვინც ამას გაბედავს, ხომ გამოაშკარავდება ვინ შეიტანა, ხომ არ დაიმალება? რამდენ ადამიანს იცნობთ, ვისაც აქვს 40 000 ლარი, რომ ნიკა მელიას გადაუხადოს, აჩუქოს?", — განაცხადა ნაციონალური მოძრაობის თავმჯდომარემ.

12 თებერვალს მელიას დაკავებისთვის გენერალურმა პროკურატურამ პარლამენტს მიმართა. იმის გამო, რომ მელია ოფიციალურად პარლამენტის დეპუტატია, მას იმუნიტეტი იცავს.

გენერალურ პროკურატურას მელიასთვის იმუნიტეტის მოხსნა სჭირდება იმისთვის, რომ სასამართლოს პატიმრობის შუამდგომლობით მიმართოს. იმუნიტეტის მოხსნი საკითხი კი პარლამენტის პლენარულ სხდომაზე უნდა გადაწყდეს.

პროკურატურამ ნიკა მელიას ერთკვირიანი ვადა მისცა, რათა გირაოს თანხა გადაეხადა, რომელიც მას ელექტრონული სამაჯურის მოხსნის შემდეგ დაეკისრა. ეს ვადა სწორედ 12 თებერვალს ამოიწურა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ამავე საქმეზე ნიკა მელიასთვის იმუნიტეტის შეწყვეტა პროკურატურამ 2019 წლის ივნისშიც მიმართა. მაშინ პარლამენტმა მხარი დაუჭირა მელიასთვის იმუნიტეტის მოხსნას და პროკურატურას მისი დაკავების უფლება თუმცა სასამართლომ მას პატიმრობის ნაცვლად გირაო შეუფარდა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს არჩევნებთან დაკავშირებულ საპროტესტო აქციაზე მელიამ ელექტრონული მონიტორინგისთვის განკუთვნილი სამაჯური მოიხსნა და განაცხადა რომ მას აღარ გაიკეთებდა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 ათას ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობად 70 ათასი ლარი შეეფარდა.