საოკუპაციო ძალების მიერ უკანონოდ დაპატიმრებული ზაზა გახელაძე ე.წ. სამხრეთ ოსეთის დე ფაქტო უზენაესი სასამართლოს განაჩენს არ გაასაჩივრებს. ამის შესახებ ინფორმაცია On.ge-ს გახელაძის ცოლმა, ირმა ბუთხუზმა დაუდასტურა.

"წუხელ ვესაუბრე ზაზას ადვოკატს და როგორც მითხრა ზაზას სურვილი არისო, რომ არ გაასაჩივროს გადაწყვეტილება. ჩვენ, რა თქმა უნდა, პატივს ვცემთ ზაზას სურვილს და მის გადაწყვეტილებაზე წინ არაფერს დავაყენებთ", — ამბობს ირმა ბუთხუზი.

ოკუპირებული ცხინვალის ე.წ. სასამართლომ, ზაზა გახელაძეს 12 წლითა და 6 თვით უკანონო პატიმრობა 5 თებერვალს მიუსაჯა.

საოკუპაციო ძალების მიერ გასული წლის ზაფხულში დაკავებულ ზაზა გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. რუსული მხარის მტკიცებით, ზაზა გახელაძემ ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გაიგეთ მეტი: