ევროპული საქართველოს ერთ-ერთი ლიდერი, გიგი უგულავა ადასტურებს, რომ უკრაინაში ვიზიტის დროს მიხეილ სააკაშვილს შეხვდა. მისი თქმით, მათი საუბარი ძირითადად უკრაინას ეხებოდა.

"სააკაშვილი ვნახე. დიდი საუბარი მასთან არ მქონია, გადავიკვეთეთ უბრალოდ. ძირითადად ვისაუბრეთ უკრაინაზე. საქართველოს საკითხებზე მასთან არ მილაპარაკია, მით უმეტეს, პარტიულ საკითხებზე. ვთვლი, რომ ნაციონალურ მოძრაობას ყავს არჩეული თავმჯდომარე და თუ რამე მაქვს სათქმელი ნაციონალური მოძრაობისთვის, ურთიერთობა მაქვს ბატონ ნიკასთან", — თქვა უგულავამ.

მან განმარტა, რომ უკრაინაში მისი ვიზიტის მიზანი იმ ადამიანების ნახვა იყო, რომლებსაც იმის გამო, რომ ციხეში არ წასულიყვნენ, მოუწიათ ქვეყნის დატოვება.

დღეს ცნობილი გახდა, რომ გიგი უგულავა და დავით ბაქრაძე ევროპულ საქართველოში პარტიულ თანამდებობებს ტოვებენ. მათი ინფორმაციით, მაისში იქნება პარტიის ყრილობა, სადაც თავიანთ კანდიდატურებს არ დააყენებენ. მათ არ უთქვამთ, რომ პოლიტიკიდან მიდიან ან რომელიმე სხვა პარტიაში გადადიან, თუმცა ევროპული საქართველოდან წასვლა არცერთმა გამორიცხა. განსხვავებული პოზიცია აქვს გიგა ბოკერიას, მას კოლეგების გადაწყვეტილება არასწორად მიაჩნია და ფიქრობს, რომ ახლა არ არის დროს ლიდერები "გაიწიონ ხელძღვანელი პოზიციებიდან".

ევროპულ საქართველოში დაგეგმილი სტრუქტურული ცვლილებების შესახებ ინფორმაცია On.ge-მ 9 თებერვალს გაავრცელა. პარტიაში არ ადასტურებდნენ, რომ შესაძლოა, დავით ბაქრაძემ ევროპული საქართველო დატოვოს. თუმცა, ისინი ადასტურებდნენ, რომ 2020 წლის საპარლამენტო არჩევნების შემდეგ პარტიაში ცვლილებებზე დაიწყეს საუბარი.