დღეს საქალაქო სასამართლო რუსთავი 2-ის საქმის პორშეს ეპიზოდზე ბრალდების მხარის მოწმეებს მოუსმინეს. პროკურატურა არხის ყოფილ დირექტორს, ნიკა გვარამიას პორშეს მარკის ავტომანქანის უკანონონო გზით შეძენას ედავება, რამაც მათი თქმით, ტელეკომპანიის ინტერესები დააზარალა.

"არ შემიძენია [პორშეს მარკის ავტომობილი, რაც დავაში ფიგურირებს]. შეძენა ნიშნავს საკუთრებაში გადასვლას. ეს პორშე არასდროს ყოფილა საკუთრებაში. [...] იყო სარეკლამო ფირმის საკუთრებაში, მქონდა განვადების ხელშეკრულება, გადმოვიდოდა ჩემს საკუთრებაში მაშინ, როდესაც გადავიხდიდი სრულად ყველაფერს და შესაბამისად, სარეკლამო ფირმა გადაუხდიდა რუსთავი 2-ს", — განაცხადა გვარამიამ პროცესზე შესვლამდე.

მისივე თქმით, მას შეეძლო აღნიშნული ავტომანქანა სხვაგვარად ეყიდა და ამისთვის "ჩალიჩი" არ სჭირდებოდა.

"მე რო პორშე მდომოდა რუსთავი 2-ის ხარჯზე, ჩალიჩი არ დამჭრდებოდა, პრემიად გამოვიწერდი ერთ პორშეს და დავასრულებდი. ამაზე უფრო დიდი პრემიები მიმიცია ჩემი თანამშრომლებისთვის, საკუთარი თავისთვის არა. რად მინდოდა ჩალიჩი, სარეკლამო კომპანიის ფირმების, შუამავლების, ხელშეკრულებების მეშვეობით, პრემიად გამოვიწერდი პირდაპირ მარტივად", — განაცხადა გვარამიამ.

მისივე განცხადებით, დღეს, განხილვის დროს ბრალდების მიერ მოწვეული მოწმეების ჩვენებები დაცვის მხარის არგუმენტებს უფრო ამყარებდა.

"ჩვენ შევედით ბრალდების მიერ მოწვეული მოწმეების დაკითვაზე და რეალურად, გამოვედით დაცვის მხარის მოწმეების ჩვენებებით. აი, ასე ჩამოეშლება პროკურატურას ყველა მონაკვეთში ეს საქმე", — განაცხადა გვარამიამ სხდომის დასრულების შემდეგ.

გვარამიას ადვოკატის, დიმიტრი საძაგლიშვილის განცხადებით, ბრალდების მოწმეებმა დაადასტურეს მათი სიმართლე.

"რეალურად, დღეს ბრალდების მხარის მოწმეებმა მისცეს სასამართლოს ჩვენება, რომელიც არა თუ ადასტურებს ან ამყარებს ბრალდებას, არამედ პირიქით, ესაა ინფორმაცია, რომელიც ცალსახად ადასტურებს დაცვის პოზიციის სისწორეს, რომ რეალურად მთავარი ამ ტრანზაქციაში არის ის, რომ რუსთავი ორმა მიიღო სარგებელი და არა ზიანი", — განაცხადა საძაგლიშვილმა.

საქმის პროკურორმა განაცხადა, რომ ნიკა გვარამიამ თავად აარჩია კონკრეტული მანქანა პორშეს ცენტრში, რომლის სანაცვლოდაც ის რუსთავი 2-ზე რეკლამას განათავსებდა.

"დღევანდელი მოწმეები დაიკითხნენ Porche Macan S-ის შესყიდვასთან დაკავშირებით და აღნიშნულ მოწმეებს რა ჩვენებაც ჰქონდათ გამოძიებისთვის მიცემული, ანალოგიურად დაადასტურეს, რომ ნამდვილად ნიკა გვარამია იმყოფებოდა ე.წ. პორშეს ცენტრში, პირადად აარჩია მანქანა და პირადად გადაწყვიტა აღნიშნული მანქანის შეძენა ბარტერის გზით. კერძოდ რუსთავი 2-ზე განსათავსებელი რეკლამის სანაცვლოდ, მას უნდა შეეძინა ავტომობილი, ამით რუსთავი 2 სარგებელს ვერ მიიღებდა, კერძო პირს რჩებოდა სარგებელი", — განაცხადა პროკურორმა.

რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის საქმეზე პროკურატურამ ნიკა გვარამიაზე გამოძიება 2019 წლის 20 ივლისს დაიწყო.

2019 წლის 11 აგვისტოს რუსთავი 2-ის ყოფილ დირექტორს სასამართლომ აღკვეთის ღონისძიებად 40 ათასი ლარის ოდენობით გირაო შეუფარდა და პროკურატურის ნებართვის გარეშე ქვეყნის დატოვება აუკრძალა.

მალევე რუსთავი 2-ის საქმეზე პროკურატურამ მთავარი არხის გენერალურ დირექტორს, ნიკა გვარამიას ბრალი მანქანის ეპიზოდით დაუმძიმა. უცვლელად გთავაზობთ პროკურატურის ვერსიას, რომელიც ამ საქმის გამოძიების ფარგლებში 2019 წელს გამოქვეყნდა:

2019 წლის თებერვალში შპს სამაუწყებლო კომპანია რუსთავი 2-ის გენერალურმა დირექტორმა პორშეს ცენტრში მისი და მისი ოჯახის პირადი სარგებლობისთვის შეარჩია 76 700 ევროდ ღირებული ახალი ავტომობილი Porche Macan S, რომლის შეძენის მიზნით, ნიკა გვარამიამ მისი ნდობით აღჭურვილი პირის — ზ.გ.-ს [ზუკა გუმბარიძე] მეშვეობით, ავტომანქანის მფლობელი საწარმოს ხელმძღვანელებს, ტელეკომპანიის კანონიერი ინტერესის საწინააღმდეგოდ შესთავაზა, რომ ავტომობილის შეძენას განახორციელებდა ტელეკომპანია რუსთავი 2-ის ეთერში მათი სარეკლამო რგოლების განთავსების ღირებულების სანაცვლოდ.

ასევე, ნიკა გვარამიასა და მისი ოჯახის წევრებისთვის ავტომანქანის წინასწარ სარგებლობაში გადაცემისა და ე.წ. ბარტერზე დათანხმების მიზნით, ხსენებულ კომპანიას დამატებით შესთავაზა როგორც ავტომობილის ღირებულების სანაცვლოდ გასაშვები სარეკლამო რგოლების, ასევე სამომავლოდ მათი სხვა სარეკლამო რგოლების ტელეკომპანია რუსთავი 2-ის საეთერო დროში შეღავათიან/დაბალ ფასად განთავსება, სარეკლამო სააგენტო შპს პროესკო მედიას მეშვეობით.

შეთანხმებისამებრ, 2019 წლის 27 თებერვალს, პორშეს ცენტრსა და შპს პროესკო მედიას შორის გაფორმდა ავტომანქანა Porche Macan S-ის ნასყიდობის ხელშეკრულება ღირებულებით — 76 700 ევრო, რომლის საფუძველზეც ავტომანქანა ნიკა გვარამიასა და მისი ოჯახის ფაქტობრივ საკუთრებაში გადავიდა, ხოლო ფორმალურ მესაკუთრედ შპს პროესკო მედია დაფიქსირდა.

იმავე დღეს, პორშეს ცენტრსა და შპს პროესკო მედიას შორის, გაფორმდა სარეკლამო მომსახურებაზე ხელშეკრულება, ღირებულებით — 76 700 ევრო, რომლის ფარგლებშიც, ტელეკომპანია რუსთავი 2-ის ეთერში რეკლამის განთავსება შეთანხმებისამებრ ხდებოდა შეღავათიან/დაბალ ფასად.

მიუხედავად იმისა, რომ ავტომობილის მფლობელი საწარმო ასრულებდა ხელშეკრულებით გათვალისწინებულ მოთხოვნებს და სრულად უხდიდა კონტრაქტორ საწარმოს შპს პროესკო მედიას ხელშეკრულებით გათვალისწინებულ სარეკლამო ღირებულებას, კომპანია, შეთანხმებისამებრ, მნიშვნელოვნად ამცირებდა რუსთავი 2-ში, ზემოაღნიშნული კომპანიის შესაბამისი ბრენდის, რეკლამის განთავსების სანაცვლოდ გადასახდელ თანხებს, რითაც მნიშვნელოვანი ზიანი ადგებოდა ტელეკომპანიას.

ზემოაღნიშნული ქმედებებით, ნიკა გვარამიამ და მისმა ოჯახმა, ფაქტობრივ საკუთრებაში მიიღო ძვირადღირებული ავტომობილი Porche Macan S ხოლო შპს სამაუწყებლო კომპანია რუსთავი 2-მა განიცადა მნიშვნელოვანი მატერიალური ზიანი.

რუსთავი 2-ის ყოფილ ფინანსურ დირექტორს, კახაბერ დამენიას, 2019 წელს პროკურატურამ ბრალი რუსთავი 2-ის ქონების ჯგუფურად მართლსაწინააღმდეგოდ გაფლანგვის მოტივით წაუყენა. მას მალევე თბილისის საქალაქო სასამართლომ 50 000-ლარიანი გირაო შეეფარდა.

2019 წელს რუსთავი 2-ის საქმეზე ბრალი წარედგინა ინტერმედია პლიუსის დირექტორს, ზურაბ იაშვილსაც. მას კომერციულ მოსყიდვასა და ყალბი ოფიციალური დოკუმენტის გამოყენებით კომპანიისთვის მნიშვნელოვანი ზიანის მიყენებას ედავებოდნენ.