პურის მცხობელთა ასოციაციის თავმჯდომარის, მალხაზ დოლიძის განცხადებით, პურის მცხობელთა დიდი ნაწილი ელექტროენერგიის სუბსიდირების გარეშე დარჩა. ამის შესახებ მან სპეციალურ ბრიფინგზე ისაუბრა.

"12 იანვარს სახელმწიფომ მიიღო დადგენილება, რათა პურის მწარმოებლები ნაწილობრივ სუბსიდირებულნი ყოფილიყვნენ ელექტროენერგიით. გამოცხადდა ასეთი სუბსიდირების საკითხი, რომ დაახლოებით, 5 თეთრიანი შეღავათი მიეღოთ მწარმოებლებს. ეკონომიკის სამინისტრომ გააკეთა პორტალი, მაგრამ სამწუხაროდ კომუნიკაცია არ შედგა სათანადო, ბევრმა ვერ გაიგო ეს", — განაცხადა მან.

მისი თქმით, ისინი სათანადოდ არ ყოფილან ინფორმირებულნი, რომ არსებობს პორტალი, სადაც შეგიძლია განცხადება შეავსო და ელექტროენერგიის სუბსიდირებაში მოხვდე.

"თუ მადლს შვრები, მარილიც მოაყარე და გაგვაგებინე, რომ ჩვენც ჩავერთოთ ამაში. გამოვიდა ისე, რომ მატარებელი წავიდა და ვინც ვერ მოასწრო დარჩა მის [სუბსიდირების] გარეშე", — აღნიშნა დოლიძემ.

პურის მცხობელთა ასოციაციის თავმჯდომარის განცხადებით, მან სამინისტროს თხოვნით მიმართა, რომ პორტალი ხელახლა გაიხსნას და ერთი კვირა მაინც ჰქონდეთ პური მწარმოებლებს განაცხადის შესავსებათ.