ქართული ოცნების ერთ-ერთი ლიდერის, მამუკა მდინარაძის განცხადებით, მმართველი პარტიის დეპუტატის, თეა წულუკიანის მინისტრობა ერთ-ერთი საკითხია, რომელიც განიხილება.

"ჩემმა გუნდის წევრებმა რახან დაადასტურეს, მეც იგივეს გავაკეთებ, თუმცა საბოლოო გადაწყვეტილება ამასთან დაკავშირებით არ არის. ეს დამოკიდებულია თვითონ კონკრეტულ ადამიანზე, შემდეგ გუნდზე, მის სურვილზეც, რა თქმა უნდა. ადამიანი მისი სურვილის საპირისპიროდ არ უნდა განიხილო რაღაც პოზიციაზე. ჯერ-ჯერობით, ჩვენ ამაზე სიღრმისეულად არ გვიმსჯელია. მოვისმენთ მის პოზიციასაც და ამის შემდეგ იქნება გადაწყვეტილება მიღებული", — განაცხადა მდინარაძემ.

ქართული ოცნების ხელისუფლებაში მოსვლის შემდეგ თეა წულუკიანი რვა წლის განმავლობაში იუსტიციის მინისტრის პოსტი ეკავა. თანამდებობა მან 2020 წლის შემოდგომაზე დატოვა, როცა საარჩევნო კამპანიაში ჩაერთო. ამის შემდეგ ის პარლამენტში განათლებისა და კულტურის კომიტეტის თავმჯდომარედ დაინიშნა.

როგორც დაგეგმილია, განათლების, მეცნიერებისა, კულტურისა და სპორტის სამინისტრო გაიყოფა და კულტურის სამინისტრო შეიქმნება, რომელშიც სპორტისა და ახალგაზრდობის საკითხებიც გაერთიანდება.

ბოლო რამდენიმე დღეა მედიაში ვრცელდება ინფორმაცია, რომ სწორედ თეა წულუკიანი უხელმძღვანელებს ახალ სამინისტროს. თუმცა არც თვითონ წულუკიანი და არც მთავრობა აღნიშნულ ინფორმაციას ჯერჯერობით არ ადასტურებენ.

ამავე თემაზე: