ლიეტუვის საგარეო საქმეთა სამინისტრო ტვიტერის ოფიციალურ გვერდზე ეხმაურება საქართველოს მოქალაქის, ზაზა გახელაძისთვის დე ფაქტო სამხრეთ ოსეთის რესპუბლიკის მიერ გამოტანილ განაჩენს და აცხადებს, რომ ქვეყანა რჩევა საქართველოს სუვერენიტეტისა და ტერიტორიული მთლიანობის დამცველად.

"ლიეტუვის საგარეო საქმეთა სამინისტრო მკაცრად გმობს საქართველოს მოქალაქის, ზაზა გახელაძისთვის გამოტანილ განაჩენს რუსეთის მიერ კონტროლირებადი, ე.წ. სამხრეთ ოსეთის მიერ. ეს არის 2008 წლის ცეცხლის შეწყვეტის შესახებ შეთანხმების და 2021 წლის 21 იანვრის ადამიანის უფლებათა ევროპული სასამართლოს გადაწყვეტილების აშკარა დარღვევა. ლიეტუვა რჩება საქართველოს სუვერენიტეტისა და ტერიტორიული მთლიანობის ერთგულად", — ვკითხულობთ ოფიციალურ განცხადებაში.

ოკუპირებული ცხინვალის ე.წ. სასამართლომ, ზაზა გახელაძეს 12 წლითა და 6 თვით უკანონო პატიმრობა გუშინ, 5 თებერვალს მიუსაჯა.

საოკუპაციო ძალების მიერ გასული წლის ზაფხულში დაკავებულ ზაზა გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. რუსული მხარის მტკიცებით, ზაზა გახელაძემ ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გაიგეთ მეტი: