სახელმწიფო უსაფრთხოების სამსახურის ცნობით, დე-ფაქტო სამხრეთ ოსეთის სასამართლომ საქართველოს მოქალაქე გიორგი გიუნაშვილს 20 წლით თავისუფლების უკანონო აღკვეთა მიუსაჯა. სხდომა 2017 წლის 3 თებერვალს გაიმართა.

სუს-ის განცხადებით, დე-ფაქტო სასამართლოს გადაწყვეტილება, ისევე როგორც გიუნაშვილის მიმართ წაყენებული ბრალდებები, არის გამოგონილი და ყოველგვარ ლეგიტიმურ საფუძველს მოკლებული:

"სახელმწიფო უსაფრთხოების სამსახური გააკეთებს ყველაფერს გიუნაშვილის უკანონო პატიმრობიდან დასახსნელად. უსაფრთხოების სამსახური აქტიურად გააგრძელებს აღნიშნული საკითხის განხილვას ინციდენტების პრევენციისა და მათზე რეაგირების მექანიზმის (IPRM) და ჟენევის საერთაშორისო დისკუსიების (GID) შეხვედრების ფარგლებშ".

სახელმწიფო უსაფრთხოების სამსახურის ცნობით, გიუნაშვილის საქმის დეტალები უკვე მიაწოდა ყველა სახელმწიფო უწყებას, რათა აღნიშნულთან დაკავშირებით მოხდეს საერთაშორისო თანამეგობრობის ინფორმირება.