შიმშილობა მთელ მსოფლიოში ერთ-ერთი ყველაზე მწვავე პრობლემაა და როგორც არაერთი კვლევა გვეუბნება, მომავალში ის კაცობრიობისთვის კიდევ უფრო დიდი გამოწვევა გახდება.

ამის მიუხედავად, ბევრმა კარგად იცის, რომ ცნობილი რესტორნების ქსელები, კაფეები თუ კვების სხვა ობიექტები ხშირად საკვებ პროდუქტებს, რომელთაც ვეღარ იყენებენ და ერთგვარი "გამოყენების ვადა" გასდის, ნაგავში ყრიან.

ადამიანების ნაწილი ამას აპროტესტებს და ფიქრობს, რომ ჭარბი საკვების გაფლანგვის ნაცვლად ის მათ უნდა დაურიგდეს, ვისაც საერთოდ არაფერი აბადია და შიმშილობს. ამაზე ხშირად პასუხი არის ის, რომ საჭმელი ვადაგასულია და მხოლოდ სხვების უსაფრთხოების გამო ყრიან ნაგავში. თუმცა, ბევრს მიაჩნია, რომ ეს მხოლოდ სიზარმაცის, დახმარების სურვილის არარსებობისა და დამატებითი რესურსის დაზოგვის გამო ხდება.

ბოლო დღეებში ამ საკითხთან დაკავშირებული ცხარე განხილვების საფუძველი ამერიკელი მოზარდის, თექვსმეტი წლის ბრაიან ჯონსტონის მიერ TikTok-ზე გამოქვეყნებული ვიდეო გახდა, რომელიც გვაჩვენებს, თუ როგორ ყრიან Dunkin’ Donuts-ში სამუშაო დღის დასრულების შემდეგ მორჩენილ პროდუქტს:

აღნიშნულმა ვიდეომ ტიკტოკის პლატფორმაზე 26 მილიონზე მეტი ნახვა დააგროვა.

როგორც კიდევ ერთ გავრცელებულ ვიდეოში ვხედავთ, ყველა პროდუქტი, რომელიც დღის ბოლომდე არ გაიყიდება, ნაგავში ხვდება: ასობით დონატი თუ ნიჟარაში ჩაქცეული ყავა და ჩაი.

ბრაიანი აცხადებს, რომ მასზე ყოველთვის ძალიან ცუდად მოქმედებდა, როცა საკვების ნაგავში გადაყრა უწევდა მაშინ, როცა იცოდა, რომ სულ ახლოს უსახლკაროთა დახმარების ცენტრში შეეძლო მიეტანა.

"დამსაქმებლებს ურჩევნიათ, დღის ბოლოს მორჩენილი პროდუქტი ნაგავში გადაყარონ, ვიდრე თანამშრომელს დამატებითი საათის ანაზღაურება გადაუხადონ, რათა საქველმოქმედო ცენტრებში შეძლონ საჭმლის მიტანა", — ამბობს ის.

ამის მიუხედავად, გამოქვეყნებული ვიდეოების კომენტარებში მრავალმა ადამიანმა მოუწოდა მას, რომ იქნებ გადაყრის ნაცვლად როგორმე მაინც მიეწოდებინა საკვები უსახლკაროთათვის.

და ბრაიანიც ასე მოიქცა:

როგორც მოგვიანებით გახდა ცნობილი, ამის გამო ბრაიანი სამსახურიდან დაითხოვეს:

"ჩემს მენეჯერს ვიდეოს გამოქვეყნების შემდეგ კორპორაციიდან დაუკავშირდნენ და სამსახურიდან გამათავისუფლა", — ამბობს ის ვიდეოში.

მართალია, მან სამუშაო დაკარგა, თუმცა თავისი გადადგმული ნაბიჯების გამო უამრავი ადამიანისგან მხარდაჭერა მიიღო: ბევრმა სხვადასხვა ოდენობის თანხაც კი გადაურიცხა.

საინტერესოა, რა პოზიცია აქვს აღნიშნულთან დაკავშირებით Dunkin’ Donuts-ს: როგორც კომპანიაში აცხადებენ, ისინი მიესალმებიან ქველმოქმედების მიზნით საკვების გაცემას, თუმცა ამ გადაწყვეტილების მიღებას საბოლოოდ მაინც კონკრეტული ქსელის მეპატრონეებზე ან ფილიალის მენეჯერებზე ტოვებენ.

16 წლის ბრაიან ჯონსტონი კი ფიქრობს, რომ უფრო მეტი მონდომებით საერთო კეთილდღეობის მიღწევა გაცილებით მარტივად იქნება შესაძლებელი:

"ვგეგმავ, ჩემი შემთხვევა იმ პრობლემის კიდევ უფრო მკაფიოდ საჩვენებლად გამოვიყენო, თუ რა რაოდენობის საჭმელი იყრება ნაგავში ყოველდღიურად ამერიკაში, როცა ამ დროს მთელ მსოფლიოში საყოველთაო შიმშილია. თუ დანკინის მსგავსი კომპანიები გადაწყვეტენ, რომ საკვების ფლანგვა შეამცირონ / პროდუქტი მშივრებს დაურიგონ, მსგავსი პრობლემები სამყაროს გაცილებით ნაკლებად ექნება".