ხმაური და დაპირისპირება იყო დღეს ჩხოროწყუს მერიის შენობასთან, სადაც ოპოზიციური პარტიების წარმომადგენლებმა და სამოქალაქო აქტივისტებმა მერთან, დათო გოგუასთან შეხვედრა და მისი თანამდებობიდან გადადგომა კიდევ ერთხელ მოითხოვეს. მერიის შენობის წინ შეკრებილები მერის გადადგომას სოციალურ ქსელში გავრცელებულ იმ ვიდეოს გამო ითხოვენ, სადაც ჩანს, როგორ ალაგებინებენ არასრულწლოვნებს მერიის საპირფარეშოს.

აქციის მონაწილეები ჩხოროწყუს მერიაში შესვლასა და გოგუასგან განმარტებების პირადად მოსმენას ითხოვდნენ, რისი შესაძლებლობაც მათ პოლიციამ არ მისცა.

"საქართველოს პატრონი აღარ ჰყავს. საქართველო არის უზურპირებული, ჩხოროწყუ კონკრეტულად, დათო გოგუას მიერ და რამდენიმე თანააქტივისტების მიერ, რომლებიც მეფეებადაც თვლიან საკუთარ თავს. მე, ლია ჭითანავას და ოპოზიციის რამდენიმე წარმომადგენელს, მათ შორის, გაერთიანებულ ოპოზიციას, არ გვაძლევენ საშუალებას შევიდეთ საკრებულოს შენობაში. აქციის მონაწილეების სახით მივმართავთ ნინო ლომჯარიას, ჩამოვიდეს და ადგილზე გაეცნოს ვითარებას, თუ რა ხდება სინამდვილეში ჩხოროწყუში", — აცხადებს ნაციონალური მოძრაობის პოლიტიკური საბჭოს წევრი, რამაზ გულუა.

რამდენიმე დღის წინ ჩხოროწყუს ერთ-ერთი საჯარო სკოლის მოსწავლეებს ადგილობრივი მერიის შენობაში გაწმენდითი სამუშაოები ჩაატარებინეს. როგორც სოციალურ ქსელში გავრცელებულ ვიდეოში ჩანს, ბავშვები საპირფარეშოს ასუფთავებენ. ჩხოროწყუს მერმა, დავით გოგუამ On.ge-ს აღნიშნული ფაქტი დაუდასტურა. მან გვითხრა, რომ ბავშვები ნამდვილად იყვნენ შენობაში და სხვადასხვა გაწმენდით სამუშაოს აწარმოებდნენ. გოგუას განცხადებით, "უმკაცრესად დაისჯება ყველა", ვინც შემხებლობაში იყო ამბავთან.

განათლების სამინისტროში აცხადებენ, რომ უწყების შიდა აუდიტის დეპარტამენტმა ფაქტის იდენტიფიცირებისთანავე დაიწყო მოკვლევა. მომხდარზე გამოძიება დაიწყო შინაგან საქმეთა სამინისტრომაც. შშს-ში ამბობენ, რომ გამოძიება სისხლის სამართლის კოდექსის 150-ე მუხლით დაიწყო, რაც იძულებას გულისხმობს