მოქალაქეების ერთ-ერთი ლიდერის, ალეკო ელისაშვილის განცხადებით, თუ მათსა და ქართულ ოცნებას შორის გაფორმებული მემორანდუმი გიორგი ვაშაძეს არ მოსწონს, "კეთილი უნდა ინებოს" და უკეთეს პუნქტებზე ემუშავოს ხელისუფლებას.

"ვაშაძე წესით უნდა ერკვეოდეს რაღაცებში. ის კანონი და კონსტიტუცია კი არ არის, რასაც ხელი მოვაწერეთ, ის არის ღია ტექსტი, მემორანდუმი, რომელიც შეიძლება შეიცვალოს. ჩვემ იმ ტექსტზე ვემუშავეთ ქართულ ოცნებას და ის ტექსტი შევიმუშავეთ. არ მოსწონს გიორგი ვაშაძეს? კეთილი ინებოს, ემუშავოს ქართულ ოცნებას და უკეთესი პუნქტები ჩააწერინოს. სასაცილოა ასეთი განცხადებები, სევდიანი სანახავია. ჩვენზე მაგარი თუ არის ხომ? ადგეს და უფრო მაგარი ტექსტი დააწერინოს. რომ გმინავს და იძახის არ ვარგაო, აი, არა ვართ ჩვენ მაგრები, ვერ შევძელით მეტი. თითონ ხომ არის ლომი და ვეფხვი, ჩაწეროს ლომებრ პუნქტები", — განაცხადა ელისაშვილმა.

როგორც სტრატეგია აღმაშენებლის ლიდერმა, გიორგი ვაშაძემ გუშინ დღის კურიერში განაცხადა, ალეკო ელისაშვილის და ხელისუფლების მიერ ხელმოწერილი დოკუმენტი მნიშვნელოვნად განსხვავდება ფასილიტატორის შუამავლობით გამართულ შეხვედრებზე არსებული დოკუმენტისგან.

"საკითხი, რომელიც შეეხება ვადამდელ არჩევნებს და რიგგარეშე არჩევნებს, ამ მემორანდუმში არ არის, მეორე, რომ პოლიტპატიმრების თემა არ არის დახურული და კვლავაც ამ მემორანდუმში არაფერია მითითებული და მესამე, ხვალ დილისთვის ყველაზე გვიან, მე გამოვაქვეყნებ დოკუმენტს, შედარებით ანალიზს, იმ საკითხებიდან თუნდაც რაზეც ჩვენ შევთანხმდით დიპლომატიურ კორპუსის შუამავლობით და რა სხვაობაა ელისაშვილის მიერ ხელმოწერილ დოკუმენტს შორის", — თქვა ვაშაძემ.

მისივე განცხადებით, ის თავად მმართველ გუნდთან ინდივიდუალური მემორანდუმის გაფორმებას გამორიცხავს და ამბობს, რომ ნებისმიერი დოკუმენტში, რასაც ხელს მოაწერს, აუცილებელია დიპლომატიური კორპუსის მონაწილეობა.