რამდენიმე კვირის წინ დადასტურდა, რომ საკულტო სერიალი Sex and the City (სექსი დიდ ქალაქში) ახალი სეზონით ეკრანებზე ბრუნდება და ერთგული ფანები მოუთმენლად ელიან ყველა დეტალს საყვარელი პერსონაჟების ისტორიის გაგრძელების შესახებ.

თუმცა, როგორც ჩანს, ჯერ თავად მსახიობებიც არ იცნობენ მომავალი სეზონის სცენარს ბოლომდე: Vanity Fair-ში გამოქვეყნებულ ინტერვიუში სარა ჯესიკა პარკერმა აღნიშნა, რომ საბოლოო სცენარი ჯერ არ წაუკითხავს, თუმცა იცის, რომ მოვლენები თანამედროვე დროს, კორონავირუსიის პანდემიის პარალელურად ვითარდება.

"ცხადია, [COVID-19] სიუჟეტის ნაწილი იქნება, რადგანაც იმ ქალაქის რეალობა, სადაც პერსონაჟები ცხოვრობენ. როგორ იცვლება ურთიერთობები, როცა მეგობრები უჩინარდებიან? მჯერა, რომ სცენარის ავტორები ამ ყველაფერს დეტალურად ასახავენ", — განაცხადა სარა ჯესიკა პარკერმა.

მსახიობმა სხვა ზოგად მოლოდინებზეც ისაუბრა: შოუს ვარსკვლავები გულმხურვალე მაყურებლებივით ელიან ისტორიის გაგრძელებას.

"ვინ არიან ისინი [სერიალის პერსონაჟები] ახლა? როგორ ადაპტირდნენ ახალ სამყაროში? რა როლი ითამაშეს ამ ყველაფერში? ცხოვრების რა გზას გაჰყვნენ? ერთი სული მაქვს, გავიგო, თუ როგორ ხედავენ სცენარის ავტორები ამ ქალებს დღევანდელი გადმოსახედიდან", — თქვა მან.

სერიალის სექსი დიდ ქალაქში გაგრძელებას ამერიკული სტრიმინგ სერვისი HBO Max იღებს. ახალ სეზონში მთავარ როლებს სარა ჯესიკა პარკერი, სინტია ნიქსონი და კრისტინ დევისი შეასრულებენ. სამწუხაროდ, მათ გვერდით ვერ ვიხილავთ კიმ კეტრელს, რომელიც სამანტა ჯონსის როლს ასრულებდა.

ახალი სეზონი ახალი თავი იქნება მილიონობით მაყურებლისთვის საყვარელი პერსონაჟების ისტორიაში და მისი სახელწოდება And Just Like That… (და სწორედ აი, ასე...) იქნება. სიუჟეტი თანამედროვე დროში, კვლავ ნიუ-იორკში განვითარდება და 50 წელს გადაცილებული კერი ბრედშოუს, შარლოტ იორკისა და მირანდა ჰობის მეგობრობისა და სიყვარულის თავგადასავლებზე მოგვითხრობს.

სეზონში სულ ათი სერია შევა და თითოეულის ხანგრძლივობა ერთი საათი იქნება. გადაღებები უახლოეს მომავალში დაიწყება, პრემიერის ზუსტი თარიღი კი ჯერ უცნობია.