ივერი მელაშვილის ადვოკატის, გიორგი მშვენიერაძის განცხადებით, ის გადაწყვეტილება, რაც დღეს სასამართლომ მიიღო, ყველასთვის სასარგებლოა. ამის შესახებ მან ფორმულას ეთერში ისაუბრა.

"პირველ რიგში, უნდა ვთქვათ, რომ მიღებული გადაწყვეტილება არის ყველასთვის სასარგებლო. ეს არის სასარგებლო პირველ რიგში ბრალდებულებისთვის, რომლებიც ამდენი ხნის მანძილზე, ჩვენი აზრით, უკანონოდ და უსაფუძვლოდ იყვნენ პატიმრობაში. ეს კარგია სახელმწიფოსთვისაც, რადგან, ის ლაქა, რომელიც სახელმწიფოს აქვს ამ ორი უდანაშაულო ადამიანის პატიმრობის გამო, უნდა ჩამოირეცხოს. ჩვენთვის, ადვოკატებისთვის, ეს არის ბრძოლაში გადადგმული პირველი ნაბიჯი, რომელშიც წარმატებას მხოლოდ ჩვენ ვერ მივიწერთ, ეს არის მთელი საზოგადოების დამსახურება", — განაცხადა მშვენიერაძემ.

კარტოგრაფების საქმეზე ბრალდებული ივერი მელაშვილი და ნატალია ილიჩოვა გირაოს სანაცვლოდ გაათავისუფლეს. თბილისის საქალაქო სასამართლომ ნაწილობრივ დააკმაყოფილა პროკურატურის შუამდგომლობა, რომელიც აღკვეთის ღონისძიების შეცვლას — პატიმრობის ნაცვლად გირაოს შეფარდებას გულისხმობდა. სასამართლომ თითოეულ ბრალდებულს 20 000-ლარიანი გირაო შეუფარდა. ამასთან, დააკმაყოფილა პროკურატურის შუამდგომლობა ივერი მელაშვილის თანამდებობიდან გადაყენების შესახებ, რადგან მიიჩნია, რომ ეს თანამდებობა პირდაპირ არის კავშირში საქმეში არსებულ ინფორმაციებთან.