საქართველოს ყოფილი პრემიერმინისტრის, მამუკა ბახტაძის მიერ დაფუძნებული ახალგაზროდობის სააგენტო გაუქმებული და ხელახლა შექმნილი კულტურის სამინისტროს ნაწილი იქნება. ამავე სამინისტროში გაერთიანდება ყოფილი სპორტისა და ახალგაზრდობის სამინისტრო. ამის შესახებ დღეს, მთავრობის სხდომაზე, მოქმედმა პრემიერმინისტრმა, გიორგი გახარიამ განაცხადა.

"უკვე ყველა ტექნიკური სამუშაო დასრულებულია და მომზადებულია მთავრობის დადგენილება იმასთან დაკავშირებით, რომ განათლების სამინისტროსგან გამოიყოს კულტურის, სპორტის და ახალგაზრდობის სამინისტრო. ეს არის უაღრესად მნიშვნელოვანი ნაბიჯი, როგორც ჩვენი კულტურის, ისე სპორტის სფეროს წარმომადგენლებისთვის. ყველას უნდა გვესმოდეს, რომ ჩვენი კულტურული მემკვიდრეობა, ისევე როგორც თანამედროვე ხელოვნება, არის ის უძვირფასესი ნაწილი ჩვენი ცხოვრების, რომელზეც ყველამ ერთად უნდა ვიზრუნოთ და ცალკე სამინისტროს, ისევე როგორც სპორტის მიმართულებით, განსაკუთრებით თუ გავითვალისწინებთ ბოლო წლებში ჩვენი სპორტსმენების მიღწევებს, იმსახურებს. გარდა ამისა, მინდა გითხრათ, რომ ახალგაზრდობის სააგენტო, რომელიც აქამდე ფუნქციონირებდა მთავრობის ადმინისტრაციის ქვეშ, მთავრობის ადმინისტრაციის ზედამხედველობით, ამ დადგენილების თანახმად, გახდება კულტურის, სპორტის და ახალგაზრდობის სამინისტროს ნაწილი", — განაცხადა გახარიამ.

მთავრობამ ახალგაზრდობის სააგენტო 2019 წელს დააფუძნა. მისი ხელმძღვანელი მანამდე ახალგაზრდობის საკითხებში პრემიერის მრჩეველი, რეზო ჩარკვიანი გახდა. დებულების მიხედვით, ახალგაზრდობის სააგენტო სახელმწიფო ახალგაზრდული პოლიტიკის სტრატეგიის შემუშავების, განხორციელებისა და კოორდინაციის მიზნით შეიქმნა.