ოკუპირებული ცხინვალის დე ფაქტო ლიდერი, ანატოლი ბიბილოვი აგვისტოს ომის საქმეზე ადამიანის უფლებათა ევროპული სასამართლოს გადაწყვეტილებას პოლიტიზებულსა და ცალხმრივს უწოდებს. მისივე მტკიცებით, სასამართლომ მხოლოდ საქართველოს ხელისუფლების პოზიცია მიიღო და გადაწყვეტილება არ ასახავს რეალურ გარემოებებს.

"ალბათ, იყო გათვლა იმაზეც, რომ 12 წლის შემდეგ მსოფლიოში ცოტას თუ ემახსოვრებოდა 2008 წლის აგვისტოს მოვლენები", — აღნიშნავს ის. იგი ასევე წუხს, რომ სასამართლომ მხედველობაში არ მიიღო ტალიავინის დასკვნა.

აღნიშნულ საქმეზე განსხვავებული პოზიცია აქვს ოკუპანტ ქვეყანასაც. რუსეთის იუსტიციის სამინისტროში აცხადებენ, რომ სასამართლომ საქართველოს ბრალდებები 8-12 აგვისტოს განვითარებულ მოვლენებთან დაკავშირებით უსაფუძვლოდ მიიჩნია.

რუსეთის იუსტიციის უწყება, აგრეთვე, ევროპული სასამართლოს ცალკეულ შეფასებებს არ ეთანხმება. მათ შორის, იმ ეპიზოდებშიც, რომელშიც საქმე ოკუპირებული აფხაზეთსა და ე.წ. სამხრეთ ოსეთში 2008 წლის 12 აგვისტოს შემდეგ მომხდარ ინციდენტებს, რომლებზეც სტრასბურგის სასამართლომ პასუხისმგებლობა რუსეთს დააკისრა. სამინისტროს მტკიცებით, რუსული მხარის ბრალეულობის მტკიცებულება წარდგენილი არ ყოფილა.

უწყებაში მიაჩნიათ, რომ სასამართლოს ამგვარი გადაწყვეტილება მათ მიერ ე.წ. ექსტერიტორიალური იურისდიქციის კონცეფციის გამოყენების შედეგია, რომლის შინაარსიც გაეროს საერთაშორისო სასამართლოსა და საერთაშორისო სამართლის საყოველთაოდ აღიარებულ პრინციპებს ეწინააღმდეგება.

ადამიანის უფლებათა ევროპული სასამართლოს გადაწყვეტილება აგვისტოს ომის საქმეზე დღეს, 21 იანვარს გახდა ცნობილი. დიდმა პალატამ რუსეთის წინააღმდეგ საქართველოს ყველა ძირითადი სარჩელი დააკმაყოფილა.

კერძოდ, სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა.

სასამართლოს დიდმა პალატამ, კონვენციის მე-4 მუხლის შესაბამისად, რაც სიცოცხლის უფლებას გულისხმობს, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.

აღნიშნული გადაწყვეტილება 17 მოსამართლისგან შემდგარმა სასამართლოს დიდმა პალატამ მიიღო, რომელიც არ საჩივრდება.

აგვისტოს ომის საქმეზე საქართველო რუსეთს ევროპული კონვენციის 8 მუხლის დარღვევაში ადანაშაულებდა. კერძოდ, საქართველო მიიჩნევს, რომ რუსეთმა ომისა და შემდგომი ოკუპაციის დროს დაარღვია ევროპული კონვენციის შემდეგი მუხლები:

  • სიცოცხლის უფლება;
  • წამების, არაადამიანური ან ღირსების შემლახველი მოპყრობის ან დასჯის აკრძალვა;
  • თავისუფლებისა და უსაფრთხოების უფლება;
  • პირადი და ოჯახური ცხოვრების დაცულობის უფლება;
  • სამართლებრივი დაცვის ქმედითი საშუალების უფლება;
  • საკუთრების დაცვა;
  • განათლების უფლება;
  • მიმოსვლის თავისუფლება.