საქართველოს ექსპრეზიდენტის მიხეილ სააკაშვილის განცხადებით, სტრასბურგის სასამართლოს გადაწყვეტილება აგვისტოს ომზე არის მეორე გამარჯვება მისი მთავრობის, მთავრობიდან წასვლის შემდეგ. სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არადამიანური და ღირსების შემლახველი მოპყრობისთვის რუსეთი დაადანაშაულა.

"ეს არის მეორე გამარჯვება ჩემი მთავრობის, ჩემი მთავრობის წასვლის შემდეგ. პირველი გამარჯვება ჩვენ მოვიპოვეთ შუალედური ჰააგის საერთაშორისო სასამართლოში, ეს არის გაეროს სასამართლო, რომელიც წულუკიანის მცდელობით მეორე ეტაპზე დავკარგეთ და ეს არის მეორე გამარჯვება, ჩემი მთავრობის იმიტომ, რომ თავის დროზე შევიტანეთ სარჩელი სტრასბურგში", — განაცხადა მან.

მისივე თქმით, ეს არის საქართველოს გამარჯვება, რადგან ბიძინა ივანიშვილისა და "მოსკოვიდან მისი პატრონების" მცდელობის მიუხედავად, საქართველოს ომის დამწყებად და ოკუპანტად გამოყვანის გეგმა ჩაუფლავდათ.

"ეს არის გამარჯვება საქართველოსთვის, იმიტომ, რომ ისტორიული სიმართლის დადგენისთვის, რომ საქართველო იყო მართალი და არის ცამდე მართალი და არის აგრესიის მსხვერპლი, მიუხედავად ივანიშვილის მთელი მცდელობებისა და მისი პატრონების მოსკოვიდან, რომ საქართველო გამოეყვანათ ომის დამწყებად, ოკუპანტად, ეს ჩაუფლავდათ", — განაცხადა მან მთავარი არხის ეთერში.

ადამიანის უფლებათა ევროპული სასამართლოს დიდმა პალატამ აგვისტოს 2008 წლის ომზე საქართველოს ძირითადი სარჩელი დააკმაყოფილა. სასამართლოს დიდმა პალატამ, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.

საქართველოს იუსტიციის სამინისტროს განცხადებით, ამ და სხვა დარღევევების აღიარებით, 2008 წლის აგვისტოს ომის დროს რუსეთის მიერ ქართველების წინააღმდეგ განხორციელებული ეთნიკური წმენდა დასტურდება.

გაიგეთ მეტი: