წიგნაკი, რომელშიც მწერალი ვირჯინია ვულფი ლიტერატურული სამყაროს ყველაზე ცუდი და საუკეთესო ავტორების შესახებ მოსაზრებებს აფიქსირებს, ინგლისში, აუქციონზე გაიყიდება.

წიგნაკი რამდენიმე მწერლის პასუხებს მოიცავს კითხვებზე: ვინ არის "უდიდესი გენიოსი" და "ყველაზე ცუდი ინგლისურენოვანი მწერალი".

აუქციონის ორგანიზატორის. კრის ალბურის თქმით, ეს "უნიკალური, ლიტერატურული საგანძურია".

ვირჯინია ვულფი და მარგარეტ კენედი იმ ავტორებს შორის არიან, რომლებიც ტექსტში საკუთარ მოსაზრებებს აჟღერებენ. ხელნაწერი პასუხების ნაკრები 1923-1927 წლებით თარიღდება.

ფოტო: Dominic Winter Auctioneers

ტექსტი 39 კითხვას მოიცავს, მათ შორის: "ყველა დროის საუკეთესო მწერალი?" და "ყველაზე ცუდი თანამედროვე დრამატურგი?".

ჩანაწერები კენედის შვილიშვილმა უილიამ მაკეზიმ აღმოაჩინა, როცა ბებიის არქივს ახარისხებდა.

მაკეზის თქმით: "დაწუნებული ავტორები ყველაზე დიდი გასართობია. დეივიდ ჰერბერტ ლორენსი და ჯეიმს ჯოისი ზედმეტად დაფასებულ ავტორებად არიან დასახელებული. საინტერესოა, როგორ იცვლება აღქმა დროში. დღეს ყველაზე მნიშვნელოვან მწერლებად მიჩნეული ზოგიერთი ავტორი ტექსტში მოხსენიებულიც კი არ არის".

ფოტო: PA Media

წიგნაკის სავარაუდო ფასი 4-დან 6 ათას ფუნტამდე იქნება. ალბურის თქმით, ტექსტში მრავალი აღმოჩენაა.

"ვირჯინიას იასამნისფერი მელნით ნაწერი, 100-მდე ხელნაწერი სიტყვა ბევრს ამბობს მწერლის ლიტერატურულ მისწრაფებებსა და გემოვნებაზე, ზოგი მთელ ბიოგრაფიას სწავლობს მსგავსი დეტალების მისაგნებად. უნიკალური ლიტერატურული განძია", — აღნიშნა ალბურიმ.