ლელოს თავმჯდომარის, მამუკა ხაზარაძის განცხადებით, ადამიანს, რომლის ერთადერთი დავალებაა ქართული ოცნებიდან არეულობა შეიტანოს ოპოზიციის ბრძოლაში, ის, მისი პარტნიორები და მეგობრები არც ხელს ჩამოართმევენ და არც შეხვედრაზე დაუძახებენ.

"არანაირი ერთობა არ გამოვა, არანაირი კოალიცია არ გამოვა, თუ იქ არ არსებობს სისუფთავე, არ არსებობს ურთიერთობა, არ არსებობს სიტყვის ფასი. ამიტომ, მე მას პირდაპირ ვუთხარი, რომ მატყუარას და ასეთ ჭორიკანა ადამიანს, რომელის ერთადერთი დავალებაა ქართული ოცნებიდან, რომ არეულობა შეიტანოს იმ სამართლიან ბრძოლაში, რასაც გაყალბებული არჩევნების წინააღმდეგ ბრძოლა ჰქვია, მე პირადად, ჩემი პარტნიორები და ჩემი მეგობრები არც ხელს ჩამოვართმევთ, არც შეხვედრაზე დავუძახებთ.

მას აქვს ერთადერთი გზა — შეუერთდეს ოცნებას, გახდეს მათი წევრი ოფიციალურად, იმიტომ, რომ მან გადააჭარბა, კიდევ ვიმეორებ, მე არ მეგულება ოცნებაშიც კი ადამიანი, რომელსაც შეუძლია, რაც არ უნდა დაპირისპირებული ვიყოთ, ასე ღვარძლი ამოანთხიოს ", — განაცხადა ხაზარაძემ მთავარი არხის ეთერში.

ღამის კურიერის ეთერში ლელოს თავმჯდომარეს, მამუკა ხაზარაძესა და მოქალაქეების ლიდერს, ალეკო ელისაშვილს შორის სიტყვიერი დაპირისპირება მოხდა. ხაზარაძემ უარყო ელისაშვილის განცხადება, რომ ოპოზიციის დახურულ შეხვედრაზე მის კითხვაზე, რა ხდება მეორე სცენარში, უპასუხა: "ომია, ძმაო, და რაღაც იქნება". ელისაშვილი ამტკიცებდა, რომ ეს მართლა მოხდა, რის გამოც ხაზარაძემ მას მატყუარა უწოდა და ამას სიტყვიერი დაპირისპირება მოყვა.

"ცოტა ახლოს ხომ არ დაგენახო? ალეკო ვარ ელისაშვილი", — ასე უპასუხა მან ხაზარაძის მიმართვას: "დამანახეთ ეს არარაობა".

პოლიტიკოსები ერთმანეთს უყვიროდნენ და სკამებიდან წამოდგნენ. მათ შორის ტელეწამყვანები, დაცვის წევრი და გირჩის ლიდერი იაგო ხვიჩია ჩადგნენ, რომელიც ამ დროს სტუდიაში იმყოფებოდა. ელისაშვილმა ყვირილი და ხაზარაძის კრიტიკა გააგრძელა. ეთერი სარეკლამო ჭრით შეწყდა, რის შემდეგაც სდუტიაში მხოლოდ ელისაშვილი და ხვიჩია დაბრუნდნენ.

ამავე თემაზე: