საქართველოს მთავრობა არ აპირებს გადასახადების ზრდის შესახებ კონსტიტუციაში ცვლილებები შეიტანოს. კერძოდ, საქმე ეხება ახალი სახის საერთო სახელმწიფოებრივი გადასახადის შემოღებას ან არსებული გადასახადის განაკვეთის ზრდისთვის რეფერენდუმის გაუქმებას.

ამის შესახებ,ბიზნესკონტრაქტი პრემიერმინისტრის პრესსამსახურზე დაყრდნობით ავრცელებს ინფორმაციას.

გამოცემის ინფორმაციით, პრემიერი აცხადებს, რომ კონსტიტუციით მოქმედი აღნიშნული ნორმები სრულ თანხვედრაშია ქვეყნის ეკონომიკური განვითარების სტრატეგიასთან და მის შეცვლას სახელისუფლებო გუნდი არ განიხილავს.

მათივე ცნობით, ცვლილება შესაძლოა შეეხოს ჩანაწერს საპენსიო შენატანებთან დაკავშირებით, რომ ის არ ჩაითვალოს ახალ გადასახადად.

ინიციატივა გუშინ სოციალ-დემოკრატების ლიდერმა გია ჟორჟოლიანმა გააჟღერა. კერძოდ, იგი გულისხმობს საკონსტიტუციო ჩანაწერის ამოღებას, რომელიც ახალი გადასახადის დაწესებას, ან გადასახადის გაზრდას მხოლოდ რეფერენდუმის მეშვეობით ხდის შესაძლებელს.