პარლამენტის ყოფილი თავმჯდომარე და ქართული ოცნების აღმასრულებელი მდივანი, ირაკლი კობახიძე პარტიის თავმჯდომარის პოსტზე წარადგინეს. მან პოლიტიკიდან უკვე მეორედ წასული ბიძინა ივანიშვილი უნდა შეცვალოს. პარტიის ყრილობა 16 იანვარს ჩატარდება და იქ გადაწყდება კობახიძის ოფიციალური დანიშვნაც.

On.ge დაინტრესდა, რა ქონებას ფლობს კობახიძე. 2020 წლის 31 დეკემბერს შევსებული დეკლარაციით, კობახიძეს თბილისში, წყნეთის გზატკეცილზე აქვს ბინა (157,8მ2) და ავტოფარეხ (20მ2). იგი, ასევე, ფლობს 20 ათასი დოლარის ღირებულის ავტომანქანა Mercedes-Benz S-Class-ს, რომელიც გასულ წელს შეიძინა.

როგორც დეკლარაციაშია მითითებული, თიბისი ბანკში ირაკლი კობახიძეს ჯამურად 62 070 ლარი აქვს. მის ცოლს, ნატალია მოწონელიძეს კი ორ ბანკში სახელფასო ანგარიშზე ჯამში 4 868 ლარი აქვს დარიცხული.

2019 წელს შვილების განათლებაში ირაკლი კობახიძემ 13 468 ლარი გადაიხადა. ამასთან, ავტომობილის გასხვისებით მიღებულმა შემოსავალმა 6 000 დოლარი შეადგინა.

2019 წელს პარლამენტის წევრის რანგში ირაკლი კობახიძემ ხელფასის სახით 59 646,72 ლარი აიღო. გარდა ამისა, იგი თბილისის სახელმწიფო უნივერსიტეტში პროფესორია, რაშიც 13 641,6 ლარი აიღო.

თბილისის სახელმწიფო უნივერსიტეტში ასოცირებული პროფესიორია ნატალია მოწონელიძეც, სადაც 11 472 ლარის ოდენობის ხელფასი აიღო. 2019 წლის პირველ ნახევარში მოწონელიძე შინაგან საქმეთა სამინისტროს აკადემიაში რექტორის მრჩეველი იყო, სადაც 14 880 ლარი გამოიმუშავა. ამავე წლის მეორე ნახევარში ის საჯარო და კერძო თანამშრომლობის სააგენტოში თავმჯდომარის მოადგილის პოსტზე გადავიდა და ხელფასის სახით 26 754 ლარი აიღო.