გერმანიის კანცლერის, ანგელა მერკელის თქმით, აშშ-ს კონგრესზე თავდასხმის გამო გაბრაზებული და დამწუხრებულია. მის განცხადებას BBC ავრცელებს.

"ღრმად ვწუხვარ, რომ ნოემბრის შემდეგ პრეზიდენტმა ტრამპმა არ აღიარა თავისი დამარცხება და ეს არც გუშინ გააკეთა", — აღნიშნა მერკელმა გერმანელ დეპუტატებთან შეხვედრისას.

როგორც კანცლერი აღნიშნავს, არჩევნების შედეგებთან დაკავშირებით ეჭვები გამწვავებული იყო, რამაც გუშინდელი ღამის მოვლენები განაპირობა. ის მიესალმება კონგრესის გადაწყვეტილებას მხარი დაუჭიროს ჯო ბაიდენის პრეზიდენტობას და აღნიშნავს, რომ მისმა ინაუგურაციამ ამერიკის დემოკრატიაში ახალი თავი უნდა დაიწყოს.

"ეს ნიშნავს, რომ დემოკრატიულმა ძალებმა გაიმარჯვეს", — განაცხადა მერკელმა.

კაპიტოლიუმზე თავდასხმა გააპროტესტეს მსოფლიოს სხვა ლიდერებმაც. მათი დიდი ნაწილი დემონსტრანტებს მშვიდობისკენ მოუწოდებდა და ხელისუფლების მშვიდობიან გადაცემაზე საუბრობდა.

დიდი ბრიტანეთის პრემიერმინისტრმა, ბორის ჯონსონმა არეულობას "სამარცხვინო სცენები" უწოდა. შოტლანდიის პირველმა მინისტრის, ნიკოლა სტარჯონის თქმით, კაპიტოლიუმიდან გავრცელებული კადრები "საშინლად შემზარავი" იყო.

კანადის პრემიერმინისტრის, ჯასტინ ტრუდოს განცხადებით, ისინი შეშფოთებული და დაღონებული არიან დემოკრატიაზე ასეთი შეტევით.

"ძალადობა ვერასდროს ჩაახშობს ხალხის ნებას. აშშ-ში დემოკრატია მხარდაჭერილი უნდა იყოს და ასეც იქნება", — განაცხადა ტრუდომ.

თურქეთის საგარეო საქმეთა მინისტრმა ყველა მხარეს მოუწოდა, თავშეკავება და ჯანსაღი აზრი გამოიჩინოს. ვენესუელის ხელისუფლების განცხადებით, კაპიტოლიუმში არეულობით აშშ ზარალდება იმავე ქმედებით, რასაც სხვა ქვეყნებში თავისი აგრესიული პოლიტიკით ახალისებს.

6 იანვარს ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

შეწყდა სხდომა, რომელზეც არჩევნების შედეგები უნდა დაემტკიცებინათ. სწორედ ამას აპროტესტებდნენ ტრამპის მხარდამჭერები, რადგან მოქმედ პრეზიდენტს სჯერა, რომ მან გაიმარჯვა და არჩევნები გაყალბდა.

რამდენიმესაათიანი არეულობის შემდეგ სენატში სხდომა განახლდა. ბოლო ინფორმაციით, ოთხი ადამიანი გარდაიცვალა. ერთ-ერთ ქალს კაპიტოლიუმში პოლიციამ შეჭრის დროს ესროლა.

არეულობის შედეგად დაშავდა პოლიციის სულ მცირე 14 თანამშრომელი. ორი ჰოსპიტალიზირებულია. ბოლო მონაცემებით, დაკავებულია 52 პირი: 4 ლიცენზიის გარეშე იარაღის ტარებისთვის, 1 აკრძალული იარაღის ტარებისთვის, 47 კი კომენდანტის საათის დარღვევისთვის.

გარდა ამისა, პრეზიდენტ დონალდ ტრამპის ტვიტერის ანგარიში 12 საათით დაიბლოკა. CNN-ის ინფორმაციით, კომპანიაში განაცხადეს, რომ მიზეზი სამომხმარებლო წესების დარღვევა და ძალადობის წამახალისებელი ტვიტებია. მათივე თქმით, თუ ტრამპი აღნიშნულ პოსტებს არ წაშლის, ანგარიშს განმეორებით დაბლოკავენ.

გაიგეთ მეტი: