სტრატეგია აღმაშენებლის ერთ-ერთმა ლიდერმა, სერგო ჩიხლაძემ ნინო ანანიაშვილის გადაწყვეტილებასთან დაკავშირებით განაცხადა, რომ დიდი ბალერინა ყოველთვის სახელმწიფოებრივად მოაზროვნესა და კარგ მოქალაქეს არ ნიშნავს.

"სამწუხაროდ, დიდი ბალერინა არ ნიშნავს ყოველთვის სახელმწიფოებრივად მოაზროვნე ადამიანს და კარგ მოქალაქეს, სამწუხარო ფაქტია. მით უმეტეს, რომ ნოვოსიბირსკის თეატრიც არ არის პირველი რანგის თეატრი თვითონ რუსეთშიც, ამიტომ გაურკვეველია ეს არჩევანი და ასევე, კიდევ უფრო გაურკვეველია, როგორ დარჩება ქალბატონი ნინო ორივე დასის ხელმძღვანელად. ბატონი გრიგოლი აღარ არის ამ პარტიის თავმჯდომარე და არ მგონია, რომ რამე რეპუტაციული ზიანი მიაყენოს ქალბატონი ნინოს ამ გადაწყვეტილებამ", — ამბობს ჩიხლაძე.

ქართული საბალეტო დასის ხელმძღვანელი, ნინო ანანიაშვილი რუსეთში, ნოვოსიბირსკის საბალეტო დასს უხელმძღვანელებს. ანანიაშვილი გადაწყვეტილებას პანდემიის გამო შექმნილი ფინანსური მდგომარეობით ხსნის. ის აცხადებს, რომ რუსულთან ერთად ქართულ დასსაც უხელმძღვანელებს და მსგავსი თანამშრომლობა ბალეტის სფეროში "ჩვეულებრივი რამ არის".